Google pritet të çaktivizojë në muajt e ardhshëm disa funksione të inteligjencës artificiale në pajisjet elektronike që përdoren nga shkollat fillore dhe 9-vjeçare në Shtetet e Bashkuara.
Sipas kompanisë, këto funksione do të çaktivizohen si parazgjedhje dhe mund të riaktivizohen vetëm me kërkesë të drejtuesve të institucioneve arsimore.
Megjithatë, sipas raportimit të The New York Times, vendimi shoqërohet edhe me një çështje tjetër që ka ngjallur diskutime: shkollat që zgjedhin të ndalojnë përdorimin e inteligjencës artificiale mund të përballen edhe me kufizimin e aksesit në motorin e kërkimit Google.
Zëvendëspresidenti ekzekutiv i Google për sektorin e arsimit ka shpjeguar se funksionet tradicionale të kërkimit dhe modelet e inteligjencës artificiale janë tashmë të ndërthurura në sistem. Për këtë arsye, në shkollat që vendosin të çaktivizojnë AI-në, nxënësit mund të shohin në ekranin e pajisjeve një njoftim që u komunikon pamundësinë e përdorimit të motorit të kërkimit.
Ndërkohë, duke filluar nga viti 2027, Google planifikon të prezantojë një variant të funksionit Guided Learning, të bazuar në modelin Gemini. Ky sistem synon të luajë rolin e një udhërrëfyesi për nxënësit, duke i ndihmuar të kuptojnë dhe të zgjidhin problemet vetë, pa u dhënë drejtpërdrejt përgjigjet e gatshme.
Kështu, kompania synon të përshtatë përdorimin e inteligjencës artificiale në arsim, duke u dhënë shkollave më shumë kontroll mbi mënyrën se si teknologjia përdoret gjatë procesit mësimor. /skyweb.al
