Qeveria miratoi ligjin e ri “Për koncesionet dhe partneritetet publik-privat”, i cili zgjeron ndjeshëm fushat ku mund të aplikohen projektet me operatorë privatë.
Përveç sektorëve klasikë si transporti, energjia, uji dhe menaxhimi i mbetjeve, tani koncesionet dhe PPP-të do të mund të shtrihen edhe në arsimin, drejtësinë, kulturën, burgjet dhe bujqësinë, duke hapur rrugën për një përfshirje shumë më të gjerë të sektorit privat në ofrimin e shërbimeve publike.
Sipas projektligjit, partneritetet publik-private parashikohen si forma bashkëpunimi afatgjata ndërmjet shtetit dhe bizneseve private për ndërtimin, financimin ose menaxhimin e infrastrukturës dhe shërbimeve me interes publik.
Ligji përcakton kuadrin ligjor për mënyrën se si shteti dhe operatorët privatë do të ndajnë risqet financiare, fiskale dhe operacionale, si dhe procedurat për dhënien, nënshkrimin apo ndërprerjen e kontratave.
Koncesioni përkufizohet si një marrëveshje ku partneri privat shpërblehet me të drejtën e shfrytëzimit të veprës ose përmes pagesave nga shteti, ndërsa një PPP përshkruhet si një bashkëpunim i qëndrueshëm për ofrimin e shërbimeve ose infrastrukturës publike.
Ligji njeh edhe krijimin e subjekteve të posaçme (SPV) për menaxhimin e kontratave, si dhe përcakton qartë konceptin e “riskut operacional”, që transferohet te partneri privat.
Në nenin për fushën e zbatimit, ligji thekson se PPP-të mund të aplikohen në sektorë strategjikë dhe socialë, duke përfshirë transportin, energjinë, arsimin, kulturën dhe shëndetësinë. Ky zgjerim përbën ndryshimin më të madh krahasuar me draftet e mëparshme, ku partneritetet kufizoheshin vetëm në fusha infrastrukturore.
Parimet bazë të procedurave mbeten transparenca, trajtimi i barabartë dhe mosdiskriminimi, ndërsa autoritetet publike ruajnë autonominë për të zgjedhur mënyrën më efikase të menaxhimit të shërbimeve pa ndikuar në pronësinë publike.
Ligji i ri sinjalizon një hap të madh drejt modelit të “Shtetit përmes PPP-ve”, ku investimet publike do të mbështeten gjithnjë e më shumë në kapitalin privat, duke e bërë Shqipërinë një nga vendet me ekspozimin më të gjerë në rajon ndaj koncesioneve dhe partneriteteve publik-private. /skyweb.al
