Një prej kompanive më të mëdha të farmacive në Suedi ka nisur një program të pazakontë për të luftuar vetminë mes punonjësve, duke u dhënë atyre kohë të paguar gjatë orarit të punës për të komunikuar apo për t’u takuar me miqtë.
Apotek Hjärtat, që operon me më shumë se 400 farmaci dhe rreth 3,400 punonjës në të gjithë vendin, u lejon stafit të përdorë 15 minuta në javë ose një orë në muaj nga koha e punës për të ruajtur dhe forcuar marrëdhëniet shoqërore.
Programi pilot, i quajtur “Vänvård”, parashikon gjithashtu një mbështetje financiare prej rreth 90 eurosh për aktivitete që ndihmojnë në forcimin e lidhjeve sociale.
Nisma erdhi pasi një studim i kompanisë tregoi se një në pesë suedezë ndihet i vetmuar, ndërsa 64% mendojnë se të paktën një person në rrethin e tyre përjeton vetmi.
Problemi duket veçanërisht i ndjeshëm te të rinjtë. Të dhënat e cituara tregojnë se grupmosha 18-24 vjeç raporton nivele më të larta vetmie, ankthi dhe pakënaqësie me jetën, ndërsa të moshuarit suedezë rezultojnë të kenë lidhje sociale më të forta.
Sipas drejtuesve të Apotek Hjärtat, edhe 15 minuta mund të jenë të mjaftueshme për një telefonatë, një kafe ose për të planifikuar një takim me një mik.
Punonjësit marrin gjithashtu trajnim për mënyrat e parandalimit të vetmisë, ndërsa drejtuesit trajnohen për të identifikuar rastet kur një punonjës mund të jetë duke u përballur me izolim social.
Programi lidhet me traditën suedeze “fika”, që nuk nënkupton thjesht pirjen e një kafeje, por një moment pushimi dhe socializimi me të tjerët.
Në Suedi ekziston prej vitesh edhe skema “Friskvårdsbidrag”, një përfitim për mirëqenien që kompanitë mund t’u japin punonjësve dhe që mund të përdoret për aktivitete sportive, relaksuese apo të tjera që lidhen me shëndetin dhe mirëqenien.
Në rastin e Apotek Hjärtat, koncepti është zgjeruar duke trajtuar marrëdhëniet shoqërore dhe miqësinë si pjesë të mirëqenies së punonjësit. /skyweb.al
