Deputetja e Partisë Demokratike për qarkun e Durrësit, Manjola Luku, ka reaguar pas ngjarjes tragjike që ndodhi në orët e para të mëngjesit në Manëz, ku dy të rinj humbën jetën pas një konflikti të çastit.
Luku, e cila është banore e zonës, shprehet e tronditur nga krimi që ka goditur komunitetin dhe u ka bërë thirrje institucioneve të rendit dhe drejtësisë të veprojnë me shpejtësi dhe vendosmëri për zbardhjen e plotë të ngjarjes dhe vënien e autorëve përpara ligjit.
“Si deputete e zonës, por edhe si banore e këtij komuniteti, shpreh shqetësimin dhe dhimbjen e thellë për ngjarjen e rëndë që ndodhi në Manëz, ku humbën jetën dy të rinj. Kjo ngjarje është tronditëse dhe e papranueshme për të gjithë ne. U bëj thirrje institucioneve të rendit dhe drejtësisë të veprojnë me shpejtësi dhe vendosmëri për të zbardhur plotësisht rrethanat dhe për të vënë autorët përpara ligjit. Dhuna dhe armët nuk mund të jenë kurrë zgjidhje, ato shkatërrojnë jetë, familje dhe dëmtojnë besimin e qytetarëve te siguria dhe drejtësia,” – deklaron deputetja.
Në reagimin e saj, Luku përcjell ngushëllimet e sinqerta për familjet e viktimave, duke e cilësuar këtë humbje si “të rëndë dhe të parakohshme” për komunitetin e Manzës.
