Qeveria ka miratuar një vendim të ri për përditësimin e bazës së vlerësuar për vitin 2024, duke vendosur një koeficient indeksimi prej 6.4%, i cili do të përdoret në llogaritjen e pensioneve të ardhshme.
Ky mekanizëm synon të rregullojë vlerën e pagave mbi të cilat qytetarët kanë derdhur kontribute ndër vite, në mënyrë që pensioni fillestar të reflektojë më mirë kushtet aktuale ekonomike.
Indeksi i ri do të aplikohet mbi bazën individuale vjetore të përllogaritur deri në vitin 2024 dhe do të shërbejë si pikë referimi për të gjitha pensionet që do të nisin nga 1 janari 2026.
Përmes këtij vendimi, rishikohet mënyra e llogaritjes për të gjithë periudhën kontributive që nga viti 1994, duke përfshirë edhe pagat referuese sipas profesioneve të përcaktuara më herët. Pagat e viteve të kaluara do të rivlerësohen duke përdorur koeficientë të akumuluar, në mënyrë që kontributet e mëparshme të mos zhvlerësohen nga inflacioni apo ndryshimet në pagën mesatare.
Vendimi përcakton gjithashtu kufizime të qarta. Për periudhën 1994–2001, baza e vlerësuar nuk mund të kalojë trefishin e pagës minimale në nivel kombëtar. Ndërsa për vitet nga 2002 e në vazhdim, kufiri maksimal lidhet me pagën maksimale të përcaktuar në vend, sipas legjislacionit për sigurimet shoqërore.
Në fund, qeveria thekson se kostot financiare të këtij ndryshimi do të përballohen nga buxheti vjetor i Institutit të Sigurimeve Shoqërore, i cili do të jetë përgjegjës për zbatimin e skemës dhe për llogaritjen e pensioneve për të gjithë përfituesit që dalin në pension duke filluar nga viti 2026. /skyweb.al
