Inspektorati i Përgjithshëm pritet të mos jetë më nën varësinë direkte të Kryeministrisë. Një projektligj i nxjerrë për konsultim publik parashikon kalimin e këtij institucioni në varësi të Ministrisë së Ekonomisë dhe Inovacionit, në kuadër të ristrukturimit të qendrës së qeverisjes.
Ndryshimi argumentohet në relacionin shoqërues me rekomandimet e Raportit të SiGMA-s për vitin 2025, i cili analizoi funksionimin e strukturës qendrore të qeverisë shqiptare dhe evidentoi nevojën për përmirësim të koordinimit ndërinstitucional, hartim politikash të bazuara në prova dhe konsultim më të gjerë me aktorët e interesuar. Raporti thekson se këto masa janë pjesë e reformave që lidhen me procesin e integrimit europian dhe forcimin e standardeve të administratës publike.
Sipas gjetjeve të SiGMA-s, Shqipëria ka një model të theksuar centralizimi, me 26 institucione që raportojnë drejtpërdrejt në Kryeministri. Për të rritur efikasitetin dhe për të shmangur mbingarkesën në nivel qendror, është rekomanduar reduktimi i këtij numri dhe kalimi i disa strukturave në varësi të ministrive përkatëse. Për Inspektoratin e Përgjithshëm, sugjerimi konkret është vendosja nën ministrinë përgjegjëse për ekonominë.
Relacioni i projektligjit thekson se ky riorganizim synon një menaxhim më të integruar të politikave ekonomike dhe një mbikëqyrje më funksionale të aktivitetit inspektues. Duke qenë se veprimtaria e Inspektoratit lidhet drejtpërdrejt me funksionimin e tregut dhe me aktivitetin e subjekteve ekonomike, Ministria e Ekonomisë dhe Inovacionit konsiderohet autoriteti institucional më i përshtatshëm për të ushtruar këtë përgjegjësi.
Propozimi vjen pak ditë pasi në krye të këtij dikasteri, që ka në kompetencë koordinimin e inspektorateve qendrore dhe rajonale si dhe standardizimin e procedurave të inspektimit, u emërua kryeinspektori i ri, Dashnor Sula.
Projektligji është aktualisht në fazën e konsultimit publik dhe pritet të përcaktojë qartë mënyrën e tranzicionit institucional dhe kompetencat përkatëse në strukturën e re organizative. /skyweb.al
