NATO ka njoftuar një plan me vlerë rreth 4.5 miliardë dollarë për blerjen e deri në 10 avionëve të mbikëqyrjes GlobalEye, të prodhuar nga kompania suedeze Saab, të cilët do të zëvendësojnë flotën e vjetër të avionëve të paralajmërimit të hershëm AWACS, raportoi Reuters.
Sekretari i Përgjithshëm i NATO-s, Mark Rutte, deklaroi se zëvendësimi i avionëve AWACS, të cilët datojnë nga periudha e Luftës së Ftohtë, me një sistem më modern do ta forcojë aftësinë e aleancës për t’u përballur me kërcënimet e reja, përfshirë sulmet me dronë.
“Kjo do të garantojë që kapacitetet e NATO-s për mbikëqyrje dhe paralajmërim të hershëm të mbeten të fuqishme dhe të besueshme për dekadat e ardhshme”, u shpreh Rutte gjatë samitit të NATO-s në Ankara.
Vendimi për përzgjedhjen e sistemit suedez vjen në një periudhë kur presidenti i Shteteve të Bashkuara, Donald Trump, ka kërkuar vazhdimisht nga aleatët e NATO-s të rrisin shpenzimet për mbrojtjen dhe të investojnë më shumë në pajisje ushtarake amerikane.
Drejtori ekzekutiv i Saab, Micael Johansson, bëri të ditur se, nëse marrëveshja finalizohet së shpejti, dorëzimet e para të avionëve mund të fillojnë në vitin 2030.
Sipas tij, kostoja e secilit avion pritet të variojë nga 400 deri në 450 milionë dollarë.
Avionët GlobalEye do të zëvendësojnë flotën aktuale të Boeing E-3 Sentry AWACS, e cila ka qenë në shërbim të NATO-s për dekada dhe është përdorur në misione të shumta të mbikëqyrjes dhe paralajmërimit të hershëm. /skyweb.al
