Rastet e infertilitetit te gratë pritet të rriten ndjeshëm gjatë dekadës së ardhshme, duke arritur në rreth 80 milionë deri në vitin 2036, sipas një studimi të ri të publikuar në revistën shkencore The Lancet.
Studimi, i bazuar në të dhënat e projektit Global Burden of Disease 2023, parashikon një rritje me afro 50% krahasuar me vitin 2023, kur në botë u regjistruan rreth 53.6 milionë raste të infertilitetit te gratë. Rritja më e madhe pritet të shënohet në grupmoshën 35–39 vjeç.
Sipas autorëve, shtyrja e moshës së lindjes së fëmijëve është një nga faktorët kryesorë që po ndikon në këtë trend. Me kalimin e viteve, rezerva ovariane zvogëlohet, ulet cilësia e vezëve, rritet rreziku i abortit spontan dhe bien mundësitë për sukses edhe në teknikat e riprodhimit të asistuar.
Studiuesit theksojnë se plakja e popullsisë dhe ndryshimet socio-ekonomike po bëjnë që gjithnjë e më shumë gra të ekspozohen ndaj infertilitetit të lidhur me moshën, duke e kthyer këtë fenomen në një sfidë gjithnjë e më të madhe për shëndetin publik. Analiza përfshiu të dhëna nga 204 vende dhe territore në periudhën 1990–2023.
Ekspertët vlerësojnë se zgjerimi i trajtimeve të fertilitetit nuk është i mjaftueshëm për të përballuar këtë problem. Sipas tyre, nevojiten politika që mbështesin krijimin e familjes në moshë më të hershme, përmes përmirësimit të balancës mes punës dhe jetës private, sigurisë ekonomike dhe mbështetjes institucionale për prindërit e rinj.
Sipas vlerësimeve globale, rreth një në gjashtë persona do të përballet me infertilitet gjatë jetës, ndërsa 8–12% e çifteve në moshë riprodhuese përjetojnë vështirësi për të pasur fëmijë. /skyweb.al
