Në periudhën e gripit sezonal, personat më të rrezikuar për komplikacione janë të moshuarit, gratë shtatzëna, fëmijët, individët diabetikë dhe ata me sëmundje bashkëshoqëruese.
Anisa Xhaferi, specialiste e shëndetit publik pranë ISHP-së në një apel drejtuar qytetarëve, thekson rëndësinë e ndërgjegjësimit për faktorët e riskut dhe kryerjen e kontrolleve shëndetësore.
Sipas Xhaferit, mbipesha, mënyra e ushqyerjes, mungesa e aktivitetit fizik dhe historia familjare janë faktorë që ndikojnë në zhvillimin e diabetit të tipit 2.
“Mbajtja e një peshe të shëndetshme, një dietë e ekuilibruar dhe aktiviteti fizik i rregullt ndihmojnë në uljen e rrezikut të zhvillimit të sëmundjes. Ndërsa kryerja e Check-Up-it për personat mbi 35 vjeç dhe kontrolli i glicemisë mundësojnë identifikimin në kohë të diabetit dhe parandalimin e komplikacioneve”, tha ajo.
Keti Rahmani, një tjetër specialiste pranë ISHP-së shprehet se një aspekt i rëndësishëm i kujdesit për personat me diabet është mbrojtja nga infeksionet, veçanërisht nga gripi sezonal, i cili mund të rëndojë gjendjen shëndetësore dhe të rrisë rrezikun e komplikacioneve.
Rrahmani bën thirrje që personat me diabet të drejtohen pranë qendrave të tyre shëndetësore, të konsultohen me mjekun e familjes dhe të kryejnë vaksinimin kundër gripit sezonal.
“Vaksinimi ndihmon në uljen e rrezikut të komplikacioneve, shtrimeve në spital dhe pasojave të rënda të gripit te personat me diabet”, tha ajo.















