Rritja e çmimeve të karburanteve ka dhënë një shtysë të drejtpërdrejtë në të ardhurat e buxhetit të shtetit, duke reflektuar ndikimin e tyre në mbledhjen e taksave gjatë muajit prill.
Sipas të dhënave të publikuara nga Drejtoria e Përgjithshme e Tatimeve, në prill 2026 të ardhurat totale bruto arritën në 40.8 miliardë lekë, duke tejkaluar planin me 1.2 miliardë lekë, ose rreth 12 milionë euro më shumë.
Po ashtu, në krahasim me të njëjtën periudhë të një viti më parë, të ardhurat janë rritur me 2.8 miliardë lekë, duke konfirmuar një trend në rritje të arkëtimeve tatimore.
Tatimet e lidhin këtë performancë me rritjen ekonomike dhe forcimin e administrimit fiskal, por në praktikë një rol të rëndësishëm në këtë rritje kanë luajtur edhe çmimet më të larta të karburanteve.
Rritja e çmimeve të naftës dhe benzinës përkthehet automatikisht në më shumë të ardhura për buxhetin, për shkak të nivelit të lartë të taksave që aplikohen mbi këto produkte, përfshirë akcizën dhe TVSH-në. Sa më i lartë çmimi final për konsumatorin, aq më e madhe është edhe shuma që përfundon në arkën e shtetit.
Në këtë kontekst, rritja e të ardhurave në prill nuk është vetëm rezultat i përmirësimit të administrimit, por edhe pasojë direkte e kostove më të larta që po përballojnë qytetarët dhe bizneset për karburantin./skyweb.al
