Revista prestigjioze The Economist ka publikuar një analizë mbi situatën politike dhe ekonomike në Shqipëri gjatë qeverisjes së Edi Ramës, duke e përshkruar pozitën e tij si një kombinim të “kohëve më të mira dhe kohëve më të këqija”.
Sipas artikullit, Rama mbetet një nga liderët më të fortë të rajonit, i rizgjedhur për mandatin e katërt radhazi në maj të këtij viti. Ekonomia shqiptare ka shënuar rritje të ndjeshme, GDP është rritur me 160 për qind në terma euro që nga viti 2013. Po ashtu, lufta në Ukrainë ka përshpejtuar procesin e integrimit europian, me negociatat që sipas zyrtarëve të BE mund të mbyllen në vitin 2027 dhe anëtarësimi të ndodhë deri në 2030.
Por krahas këtyre zhvillimeve pozitive, The Economist thekson se Shqipëria e Ramës përballet me sfida serioze. Popullsia është tkurrur nga 2.9 në 2.4 milionë banorë gjatë udhëheqjes së tij, duke reflektuar emigracion të lartë dhe rënie të lindshmërisë. Korrupsioni mbetet i përhapur dhe SPAK ka goditur disa figura të afërta me mazhorancën. The Economist përmend rastin e kryebashkiakut të Tiranës, i cili aktualisht drejton bashkinë nga qelia.
Analiza nënvizon se Rama ushtron një kontroll të fortë mbi Partinë Socialiste dhe institucionet shtetërore, gjë që ka ngritur shqetësime për dobësimin e balancave demokratike dhe pavarësinë e institucioneve. Megjithatë, ndërkombëtarisht ai ruan një profil të lartë, duke u bërë një prej zërave më të dëgjuar të Ballkanit në Bruksel dhe kryeqytetet europiane.
The Economist shkruan se BE-ja e sheh Shqipërinë si vend të rëndësishëm për stabilitetin rajonal dhe menaxhimin e migracionit, ndaj shpesh mbështet Ramën si partner të besueshëm, edhe në kushtet kur standardet demokratike nuk ecin me të njëjtin ritëm si reforma ekonomike.
Artikulli mbyllet me vlerësimin se e ardhmja politike e Ramës do të varet nga aftësia për të balancuar sukseset ekonomike dhe pozicionin ndërkombëtar me sfidat e brendshme, krizën demografike, akuzat e korrupsionit në rrethin e ngushtë dhe pakënaqësinë në rritje ndaj mënyrës së ushtrimit të pushtetit./skyweb.al
