Vendimi i Gjykatës Kushtetuese për heqjen e pezullimit nga detyra të zëvendëskryeministres dhe ministres së Infrastrukturës dhe Energjisë, Belinda Balluku, është botuar mbrëmë në Fletoren Zyrtare, duke i dhënë efekt të menjëhershëm rikthimit të saj në detyrë.
Me botimin e vendimit, Balluku rifillon zyrtarisht ushtrimin e funksioneve, pasi Kushtetuesja pezulloi vendimet e Gjykatës së Posaçme të Shkallës së Parë për Korrupsionin dhe Krimin e Organizuar, të cilat e kishin ndaluar përkohësisht kryerjen e detyrës.
Gjykata Kushtetuese “pezullon” GJKKO-në dhe rikthen Belinda Ballukun në detyrë
Vendimi i marrë këtë të premte pezullon efektet e masës ndaluese deri në përfundimin e procesit gjyqësor, duke e rikthyer menjëherë në detyrë Ballukun. Gjykata Kushtetuese pranoi ankimimin e paraqitur për këtë çështje dhe caktoi 22 janarin 2026, ora 10:00, si datën e seancës plenare publike, ku çështja do të shqyrtohet në themel.
Kërkesa e qeverisë lidhej me mosmarrëveshjen e kompetencave midis Këshillit të Ministrave dhe GJKKO-së së Shkallës së Parë, lidhur me të drejtën e pezullimit të një anëtari të ekzekutivit. Kryeministri Rama argumentoi se vendimet e pezullimit cenonin imunitetin kushtetues të ministrave dhe parimin e ndarjes së pushteteve, duke theksuar se nuk ka precedent ndërkombëtar ku një gjyqtar i shkallës së parë vendos pezullimin e një anëtari të kabinetit qeveritar.
Gjykata Kushtetuese, me shumicë votash, pezulloi zbatimin e vendimeve nr. 118 dhe nr. 120 të muajit nëntor, duke i konsideruar si akte që prekin garancitë e imunitetit dhe kompetencat e përcaktuara nga Kushtetuta. Efektet e vendimeve të GJKKO-së mbeten të pezulluara deri në përfundimin e shqyrtimit përfundimtar.
Për shkak të interesit të lartë publik, çështja do të trajtohet në një seancë plenare publike, ku do të thirren si subjekte të interesuara SPAK, GJKKO, Kuvendi i Shqipërisë dhe Presidenti i Republikës.
/skywebal
