Përplasja mes biznesmenëve Behgjet Pacolli dhe Valon Ademi për kontrollin e Aeroportit të Vlorës ka dalë tashmë përtej një mosmarrëveshjeje aksionere, duke u shndërruar në një konflikt që po saboton drejtpërdrejt një investim strategjik për ekonominë dhe turizmin shqiptar.
Situata është përshkallëzuar pas reagimit publik të shoqërisë MABCO Construction SA, e cila deklaron se administratori aktual i Vlora International Airport po lidh marrëveshje për dyqanet Duty Free dhe shërbime të tjera tregtare, pa pasur autoritet ligjor. Sipas MABCO, e cila pretendon se zotëron 98 për qind të kapitalit të shoqërisë koncesionare, çdo kontratë e tillë është juridikisht e pavlefshme dhe e destinuar të rrëzohet në gjykatë.
Në thelb të konfliktit qëndron beteja për aksionet dhe kontrollin e koncesionit. Valon Ademi pretendon se, në bazë të një marrëveshjeje dhe kontrate noteriale, zotëron 47 për qind të aksioneve, për shkak të investimeve të kryera për ndërtimin e aeroportit. Nga ana tjetër, Pacolli e kundërshton këtë pretendim, duke deklaruar se nuk ka pranuar ndryshim të strukturës së pronësisë dhe se çdo veprim i ndërmarrë pa pëlqimin e aksionarit mazhoritar është i pavlefshëm.
Megjithatë, përtej përplasjes ligjore dhe financiare, konflikti po prodhon pasoja konkrete. Aeroporti i Vlorës, i konsideruar si një nyje kyçe për zhvillimin e turizmit në jug të vendit, mbetet i bllokuar, ndërkohë që hapja e tij ishte paralajmëruar brenda një muaji. Zvarritja e procesit po rrezikon seriozisht sezonin turistik dhe po dëmton interesin publik.
Raporti mes dy ortakëve mund të ketë qenë i tensionuar edhe më herët, për shkak të “golave” të ndërsjellë në biznese të tjera që mund të kenë, por përplasja aktuale ka marrë të tjera dimensione.
Për herë të parë, në akuzat publike mes palëve janë përmendur edhe dyshime për përfshirjen e interesave ruse në këtë projekt, çka e zhvendos konfliktin nga një çështje private në një problem strategjik
Në këtë kontekst, konflikti mes Pacollit dhe Ademit nuk shihet më thjesht si një betejë mes ortakësh, por si një faktor destabilizues për një investim të rëndësishëm kombëtar.
Në mungesë të një zgjidhjeje të shpejtë institucionale, ku shteti të verë dorë, Aeroporti i Vlorës rrezikon të mbetet peng i përplasjeve private, me kosto të drejtpërdrejta për turizmin, ekonominë dhe sigurinë e vendit. /skyweb.al
