300 punonjës të administratës do të përfitojnë kredi me 0% interes për blerjen e apartamentit
Ministria e Ekonomisë dhe Inovacionit ka hapur thirrjen për aplikim për 300 kredi me 0% interes, të dedikuara për punonjësit e administratës publike që duan të blejnë një banesë.
Aplikimet do të hapen më 27 gusht 2026 dhe do të qëndrojnë të hapura deri më 25 shtator 2026, përmes platformës e-Albania.
Financimi do të përcaktohet në bazë të çmimit të referencës së banesave dhe sipërfaqes së përcaktuar sipas certifikatës familjare.
Institucionet përfituese dhe kuotat
Kreditë do të ndahen ndërmjet punonjësve të pesë institucioneve:
- Ministria e Shëndetësisë dhe Mirëqenies Sociale – 70 kuota
- Ministria e Mbrojtjes – 70 kuota
- Ministria e Arsimit – 70 kuota
- Ministria e Punëve të Brendshme – 70 kuota
- Policia e Burgjeve / Ministria e Drejtësisë – 20 kuota
Për të aplikuar, punonjësit duhet të plotësojnë kriteret e përcaktuara në kuadër të ligjit “Për strehimin social”, ndër të cilat:
- Të jenë të punësuar në administratën publike, sipas përcaktimeve ligjore;
- Të mos kenë banesë në pronësi ose në proces legalizimi, apo të kenë një banesë nën normat e përcaktuara të strehimit;
- Të mos zotërojnë pasuri të paluajtshme ose të luajtshme me vlerë mbi gjysmën e vlerës së banesës që do të blihet përmes kredisë së lehtësuar;
- Të mos jenë përfitues të programeve të tjera të strehimit social.
Aplikantët që plotësojnë kriteret do të mund të paraqesin kërkesën e tyre online përmes e-Albania, brenda afatit 27 gusht – 25 shtator 2026.
