Në vitet 1990 dhe fillim të viteve 2000, avionët me katër motorë si Boeing 747, Airbus A340 dhe më vonë A380 dominonin qiellin dhe simbolizonin epokën e fluturimeve ndërkontinentale.
Por në vitin 2025, të gjithë këta avionë nuk prodhohen më, ndërsa pasardhësit e tyre kanë vetëm dy motorë.
Pse?
Sepse avionët me dy motorë sot bëjnë gjithçka më mirë.
Avionët modernë si Boeing 777X dhe Airbus A350 fluturojnë po aq larg sa pararendësit me katër motorë, por konsumojnë shumë më pak karburant.
Fuqia e motorëve ka arritur nivele të reja. Për shembull motori GE9X i General Electric e bën krejtësisht të panevojshëm përdorimin e katër motorëve për shumicën e linjave.
Për më tepër, rregulloret ETOPS lejojnë që avionët me dy motorë të fluturojnë orë të tëra larg nga aeroporti më i afërt ku mund të devijojnë në rast emergjence.
Kjo ka çuar në rënie të kërkesës për “gjigantët” me katër motorë.
Edhe ikonat si 747 dhe A380 nuk i mbijetuan kohës. Ishin shumë të mëdhenj për shumicën e tregjeve dhe shitjet ishin të ulëta. Linjat ajrore sot preferojnë avionë më të vegjël dhe më fleksibël, që mbushen plot dhe sjellin fitim.
A do të kemi ndonjëherë nevojë sërish për katër motorë?
Ndoshta, nëse kthehen fluturimet supersonike ose ndonjëherë ndërtohet një tjetër avion gjigand si A380.
Avioni supersonik Boom Overture do të ketë katër motorë, pasi teknologjia aktuale nuk mund të sigurojë shtytje të mjaftueshme me vetëm dy të tillë për atë version.
Por deri atëherë, avionët me katër motorë janë histori. Dy motorë janë jo vetëm të mjaftueshëm, por janë e ardhmja. Skyweb.al
