Sofia Moreira de Sousa është ambasadorja e re e Bashkimit Evropian në Tiranë, ku pritet të marrë zyrtarisht detyrën duke zëvendësuar diplomatin italian Silvio Gonzato, i cili ka drejtuar Delegacionin e BE-së në Shqipëri gjatë viteve të fundit.
Diplomatja portugeze sjell në këtë post një përvojë të gjatë në institucionet evropiane dhe në diplomacinë ndërkombëtare. Ajo ka shërbyer si Kryetare e Përfaqësisë së Komisionit Evropian në Portugali, ndërsa më herët ka mbajtur edhe detyrën e Ambasadores së BE-së në Kep Verde, krahas pozicioneve të tjera të rëndësishme në strukturat evropiane.
Emërimi i saj vjen në një moment kyç për Shqipërinë, e cila ndodhet në një fazë të avancuar të procesit të negociatave për anëtarësimin në Bashkimin Evropian. Në këtë kuadër, Moreira de Sousa do të përballet me sfidën e mbështetjes së mëtejshme të reformave dhe të procesit të integrimit, ndërsa Shqipëria synon të përmbushë objektivin për anëtarësim të plotë në BE deri në vitin 2030.
