Raporti i kredive me probleme u rrit lehtë për marsin. Sipas të dhënave nga Banka e Shqipërisë ky tregues arriti nivelin 3.85%, nga 3.8% që kishte qenë për shkurtin. Megjithatë, ky tregues ngelet ende në rënie vjetore, krahasuar me nivelin prej 4.02% të marsit të vitit të kaluar. Raporti i kredive me probleme ngelet gjithashtu pranë niveleve më të ulët në 18 vitet e fundit.
Në vlerë absolute, kreditë me probleme kanë arritur vlerën e 36.9 miliardë lekëve, në rritje me 6% krahasuar me një vit më parë.
Në muajt e parë të këtij viti, ecuria e raportit të kredive me probleme ka qenë e luhatshme, duke shfaqur tendenca të ngjashme me vitin e kaluar.
Qysh vitin e kaluar, Banka e Shqipërisë është shprehur e shqetësuar për rreziqet e një rritjeje të shpejtë të kredisë, sidomos në segmentin e financimit të pasurive të paluajtshme. Për këtë qëllim, duke filluar nga viti i kaluar janë aplikuar disa masa parandaluese prudenciale, si rritje e kërkesave për kapital ndaj bankave dhe vendosja e kufizimeve në parametrat e administrimit të riskut për huamarrësit në produktet e kredisë për blerjen e banesave.
Në gjysmën e dytë të vitit të kaluar masat nuk kanë sjellë ndonjë frenim domethënës në ritmet e kredidhënies me qëllim financimin e blerjes së banesave. Por, gjasat janë që rritja e shpejtë e kredisë dhe rreziqet inflacioniste t’i shtyjnë bankat drejt një qasjeje më të kujdesshme për vitin 2026.
Pavarësisht një ngadalësimi të lehtë, kredia për ekonominë vazhdon të ndjekë një rritje të dyshifrore edhe në muajt e parë të këtij viti.
Totali i kredisë për ekonominë në fund të marsit arriti në 958.5 miliardë lekë, me një zgjerim të mëtejshëm prej 11.7 miliardë lekësh krahasuar me shkurtin. Kredia është në rritje vjetore me 10.6% më shumë krahasuar me marsin e vitit të kaluar.
Për momentin, kosto e riskut ngelet e kontrolluar dhe pa rritje shqetësuese, por megjithatë tremujori i parë i këtij tregoi një rritje të provigjioneve (fondeve rezervë) për humbjet nga kreditë e këqija.
Provigjionet për kreditë e humbura arritën vlerën 1.58 miliardë lekëve, në rritje me 70% krahasuar me tremujorin e parë të vitit të kaluar. Fitimi neto i sektorit, i matur sipas standardeve mbikëqyrëse të Bankës së Shqipërisë, gjithashtu ka pësuar rënie, i ndikuar, mes të tjerash, edhe nga rritja e provigjioneve.
Për tremujorin, sektori bankar fitoi 6.9 miliardë lekë, 18% më pak krahasuar me tremujorin e parë të vitit të kaluar./Monitor
