Edi Rama dhe Reida Kashta, negociatore për Kapitullin 5 “Prokurimi Publik”, zhvilluan një konferencë për mediat ku folën mbi situatën aktuale të Shqipërisë në fushën e prokurimeve publike, si rezultat i reformës modernizuese dhe masave antikorrupsion të ndërmarra në këtë sektor.
Gjatë konferencës, Rama u shpreh se progresi i Shqipërisë në prokurimet publike po vlerësohet në mënyrë objektive edhe nga partnerët europianë. Ai solli në vëmendje një raport të detajuar të Gjykata Europiane e Llogarive për vendet e Bashkimit Europian, i cili evidenton një rënie të konkurrencës në prokurimet publike në disa vende të BE-së. Sipas tij, në krahasim me këto vende, Shqipëria paraqitet me tregues më pozitivë në disa fusha kyçe të sistemit të prokurimeve publike.
Kryeministri theksoi gjithashtu se numri mesatar i ofertuesve për procedurë në Shqipëri është 3.7, krahasuar me mesataren 3.2 të raportuar nga Gjykata Europiane e Llogarive për vendet e BE.
“Janë disa fjali që mund të tingëllojnë sikur fliten për Shqipërinë, por në fakt janë fjali të nxjerra nga një raport i detajuar i Gjykatës Evropiane të Llogarive për vendet e BE lidhur me prokurimet publike. I sjell në vëmendje për të vendosur në një kontekst bashkëbisedimin e sotëm, por edhe për të pasur një pamje të pozicionit ku ndodhet Shqipëria në raport me një tematikë nga më të rëndësishme e procesit të anëtarësimit dhe nga më të rëndësishmit për vetë familjen evropiane, për të ndarë me publikun, kënaqësinë e vlerësimeve të njëpasnjëshme që i janë bërë Shqipërisë së fundmi, bazuar po mbi fakte.
Raporti flet për një nivel konkurrence për kontrata publike në rënie gjatë viteve të fundit, flet për një mungesë ndërgjegjësimi, lidhur me faktin që konkurrenca është një parakusht kyç për vlerën e parasë në prokurimet publike, flet për treguesit kyç për matjen e konkurrencës që mbeten të pakënaqshme në shumicën e shteteve anëtare; flet për mbi 40% të garave të bëra me vetëm një ofertues, për një periudhë 10- vjeçare; flet për një mungesë konkurrence që ndikon në çmimet dhe në kostot dhe për një kohëzgjatje mesatare të procedurave të prokurimit të rritur me rreth 50%. Ndërkohë që, shkalla e publikimit dhe pjesëmarrja e ndërmarrjeve të vogla dhe të mesme mbeten në nivele të pakënaqshme. Këto janë vetëm disa nga konkluzionet e raportit të Gjykatës Evropiane të Llogarive për vendet e BE.
Ndërkohë që nëse e vendosim në kontekst pozicionin e vendit tonë, në indikatorët thelbësore që përcakton BE, konkurrueshmëria dhe po të shohim në tabelën e konkurrueshmërisë, pozicionin e vendit tonë, nëse në mesatare kontratat me një ofertues të vetëm përbëjnë 32.3% të kontratave në vendet e Bashkimit Europian, për Shqipërinë ato janë në masën 23.5% dhe nëse në pasqyrën e përgjithshme te shteteve anëtare, janë një grup i madh vendesh që fillojnë nga 57.4% e zbresin deri në 35.8%, Shqipëria është midis tyre dhe vendeve si Suedia, 22.9%; Gjermania 22.6%; Finlanda 20.3%; Franca 20% dhe vendi ynë është mbi këto me shumë pak, pra 23.5%”, deklaroi Rama./skyweb.al
