Normalisht, rreth një e pesta e naftës bruto dhe gazit natyror të lëngshëm në botë kalon përmes Ngushticës së Hormuzit, një korridor detar me rëndësi strategjike që tani është pothuajse i bllokuar për shkak të luftës në Lindjen e Mesme.
Konflikti nisi më 28 shkurt, kur Shtetet e Bashkuara dhe Izraeli ndërmorën një sulm ndaj Iranit. Ky i fundit u kundërpërgjigj me sulme në rajon dhe me kufizime ndaj kalimit në ngushticë.
Këtu janë pesë pikat kryesore për këtë situatë:
– Rënie drastike e trafikut detar
Qarkullimi i anijeve në Ngushticë ka rënë me 97% krahasuar me periudhën para konfliktit, sipas një analize të publikuar nga kompania e inteligjencës detare “Windward”. Nga rreth 120 kalime ditore, në dy javët pas shpërthimit të luftës u regjistruan vetëm 77 në total, sipas “Lloyd’s List”.
– Incidente të shumta sigurie
Që nga 1 marsi, janë raportuar 21 incidente që përfshijnë anije tregtare, përfshirë dhjetë cisterna nafte, në Gjirin Persik, Ngushticën e Hormuzit dhe Gjirin e Omanit, sipas UKMTO. Gjithashtu janë raportuar katër sulme të tjera të pretenduara nga Garda Revolucionare Iraniane, por pa konfirmim ndërkombëtar.
– Humbje jetësh njerëzore
Të paktën tetë marinarë dhe punonjës porti kanë humbur jetën që nga fillimi i konfliktit, sipas Organizatës Ndërkombëtare Detare. Katër persona rezultojnë të zhdukur, ndërsa dhjetë të tjerë janë plagosur.
– Mijëra njerëz të bllokuar
Rreth 20 000 persona, përfshirë pasagjerë të anijeve turistike, punonjës portesh dhe ekuipazhe detare, kanë mbetur të bllokuar në rajon. Sipas vlerësimeve, rreth 3 200 anije ndodhen aktualisht në zonë, ku deri në dy të tretat janë anije të mëdha tregtare.
– Rritje e fortë e çmimeve të karburantit
Kostoja e karburantit detar është rritur me 87% që nga fillimi i konfliktit, sipas një raporti të publikuar më 14 mars nga banka HSBC, duke arritur nivele të ngjashme me ato pas pushtimit të Ukrainës nga Rusia në vitin 2022.
