Bulevardi i Ri, Don Bosko, Astiri, Lungomare dhe Golemi po shihen si zonat me potencialin më të madh për rritjen e kërkesës për qira.
Tregu i pasurive të paluajtshme në Shqipëri vijon të transformohet, ndërsa zhvillimi i lagjeve të reja dhe investimet në infrastrukturë po ndikojnë gjithnjë e më shumë në kërkesën për prona me qira. Megjithatë, jo çdo zonë në zhvillim përkthehet automatikisht në një investim fitimprurës.
Sipas një studimi të Investropa këto zona po përfitojnë nga ndërtimet e reja, zgjerimi i rrugëve, shtimi i shërbimeve dhe përmirësimi i infrastrukturës urbane, faktorë që i bëjnë më tërheqëse për banorët dhe investitorët.
Studimi e konsideron Bulevardin e Ri si historinë më të spikatur të zhvillimit në Tiranë. Megjithatë, kthimi neto nga qiraja mbetet në nivele mesatare, rreth 3.3% për apartamentet me një dhomë gjumi dhe 3.7% për ato me dy dhoma gjumi.
Don Bosko, nga ana tjetër, vlerësohet si një zonë më e qëndrueshme për investime, falë numrit të lartë të ndërtesave të reja dhe aksesit të mirë me qendrën e kryeqytetit. Sipas analizës, kjo e bën zonën më të përshtatshme për investitorët që kërkojnë stabilitet afatgjatë, sesa kthime shumë të larta nga qiraja.
Në bregdet, zhvillimet e reja në Lungomaren e Vlorës, si edhe në Durrës e Golem, pritet të mbështesin kërkesën për prona me qira, të nxitura edhe nga zgjerimi i turizmit. Megjithatë, studimi paralajmëron se rritja e ofertës mund të shtojë konkurrencën, veçanërisht për apartamentet standarde që nuk ofrojnë avantazhe si pamja, pozicioni apo menaxhimi profesional.
Sipas Investropa, momenti i investimit mbetet vendimtar. Zonat në zhvillim mund të ofrojnë mundësi të mira përpara se përmirësimet të reflektohen plotësisht në çmimet e pronave, ndërsa blerja në një treg me shumë ndërtime të reja dhe me çmime tashmë të larta mund të ulë fitimin nga qiraja./tvscan.al
