Para se ta hidhni copën e fundit të bukës së ndenjur, dijeni se ajo mund të kthehet në një vakt të mrekullueshëm. Në traditën italiane, asgjë nuk shkon dëm, sidomos buka. Edhe pse italianët janë të njohur për dashurinë ndaj bukës së freskët, buka e djeshme nuk përfundon në kosh, por shndërrohet në pjata të reja plot shije.
Sipas organizatës ReFED, amerikanët hedhin rreth 35 milionë tonë ushqim në vit, me një kosto prej 261 miliardë dollarësh. Por kuzhina italiane ka një përgjigje për këtë: kreativitetin dhe respektin ndaj ushqimit. Shefi italian Michele Casadei Massari kujton gjyshen e tij në Monterado, e cila “kurrë nuk e hidhte bukën, por e kthente në diçka të re, në supa, në pappa al pomodoro apo në thërrime për qofte, shkruan CNN.
Pappa al pomodoro është një gjellë e trashë ku buka e fortë bëhet e butë e plot aromë falë domateve dhe vajit të ullirit. Një tjetër recetë klasike është panzanella, sallata e verës me bukë të njomur, domate, qepë, kastravec e borzilok. Në veri të Italisë, buka e vjetër përdoret për passatelli, fije të buta me bukë të tharë dhe djathë Parmigiano, që shërbehen në lëng, apo për canederli, toptha të shijshëm me djathë e erëza.
Massari e quan këtë qasje “ekonomia rrethore origjinale e Italisë”, ku çdo përbërës merr jetë të re. Edhe salca e tij e domates përgatitet pa mbeturina: përdor të gjithë frutin, të pjekur me qepë të njoma, vaj dhe kripë. Në këtë mënyrë, buka e ndenjur nuk është fundi, por fillimi i një vakti të ri. /Skyweb.al
