Konflikti mes kompanisë “MABCO Constructions” të Behgjet Pacollit dhe “2A Group” të Valon Ademit ka bllokuar punimet në Aeroportin Ndërkombëtar të Vlorës, ndërsa përplasja tashmë rrezikon të zhvendoset në arbitrazh ndërkombëtar.
Pacolli reagoi pasi Ministria e Infrastrukturës dhe Energjisë nisi procedurën për zgjidhjen e kontratës koncesionare të aeroportit, për shkak të mosrealizimit të projektit brenda afateve.
Sipas tij, MABCO nuk ka marrë ende një njoftim zyrtar nga autoriteti kontraktor dhe është informuar për procedurën përmes mediave.
Ai deklaroi se, nëse vendimi i qeverisë konfirmohet, kompania do të ndjekë çështjen në arbitrazh tregtar ndërkombëtar kundër Republikës së Shqipërisë.
Përplasja mes aksionerëve lidhet me pronësinë e kuotave, të drejtën e votës dhe kontrollin e administrimit të shoqërisë koncesionare.
Mosmarrëveshja mes MABCO-s dhe “2A Group” ka përfunduar në gjykata dhe ka sjellë pezullimin e punimeve në kantier.
Pacolli pretendon se, pas vendimit të Gjykatës së Lartë, kompanisë së tij i është penguar hyrja në aeroport dhe vijimi i punimeve.
Sipas tij, MABCO është mbajtur jashtë kantierit për muaj me radhë, ndërsa pajisje të kompanisë janë dëmtuar, shkatërruar ose vjedhur.
Ai pretendon se institucionet nuk ndërhynë për t’i garantuar kompanisë aksesin në kantier, por tani po përdorin mosrealizimin e projektit si argument për prishjen e kontratës.
Pacolli tha se MABCO ka një ekspozim financiar prej mbi 320 milionë eurosh, pa përfshirë humbjen e fitimit dhe kostot e mundshme ligjore.
Sipas tij, kompania kishte përfunduar pothuajse të gjitha detyrimet kontraktore dhe projekti ndodhej pranë fazës së certifikimit.
Ministria e Infrastrukturës u kishte lënë më herët një afat 30-ditor dy aksionerëve për të zgjidhur konfliktin dhe për të rinisur punimet.
Mosmarrëveshja nuk u zgjidh dhe qeveria kaloi në aktivizimin e procedurave kontraktore për ndërprerjen e koncesionit.
Pacolli deklaroi se veprimet e autoriteteve bien ndesh me kontratën koncesionare, vendimin e Gjykatës së Lartë dhe marrëveshjen për mbrojtjen e investimeve mes Shqipërisë dhe Zvicrës.
Ai paralajmëroi se MABCO do të përdorë të gjitha mjetet juridike dhe provat që disponon për të kërkuar dëmshpërblim.
“Kjo nuk është një kërcënim. Është pasoja juridike e veprimeve joligjore dhe mosveprimeve të papërgjegjshme të përfaqësuesve të institucioneve shtetërore”, deklaroi Pacolli. /skyweb.al
