Ministria e Infrastrukturës dhe Energjisë mësohet se ka nisur zyrtarisht procedurat për zgjidhjen e kontratës koncesionare të Aeroportit Ndërkombëtar të Vlorës. Vendimi lidhet me mosrealizimin e detyrimeve kontraktore dhe tejkalimin e afateve për përfundimin e projektit.
Siç kishte raportuar më herët Skyweb.al, (Shih KËTU dhe KËTU) ministria po shqyrtonte mundësinë e ndërprerjes së koncesionit pas bllokimit të punimeve dhe konfliktit mes aksionerëve.
Punimet në aeroport vijojnë të jenë të pezulluara, ndërsa përplasja mes kompanive është zhvendosur në gjykata.
Ministri i Infrastrukturës dhe Energjisë, Enea Karakaçi, deklaroi në qershor se palëve u ishte lënë një afat 30-ditor për zgjidhjen e mosmarrëveshjeve.
Qëllimi ishte zhbllokimi i administrimit të shoqërisë koncesionare dhe rikthimi i punimeve në kantier.
Megjithatë, konflikti nuk u zgjidh dhe punimet nuk rifilluan normalisht. Përplasja lidhet me pronësinë e aksioneve, të drejtën e votës dhe kontrollin e administrimit të kompanisë koncesionare.
“2A Group” pretendon se ka blerë një pjesë të aksioneve të “Mabco”-s, ndërsa kjo e fundit e ka kundërshtuar vlefshmërinë e transferimit.
Mosmarrëveshja solli vendime të ndryshme gjyqësore dhe përplasje për kontrollin e kantierit.
Me aktivizimin e procedurës së zgjidhjes së kontratës, qeveria kalon në fazën tjetër të mekanizmave të parashikuar në marrëveshjen koncesionare.
Ndërkohë, pronari i “Mabco”-s, Behgjet Pacolli, reagoi publikisht mbrëmjen e kaluar. Ai deklaroi se kompania do t’i drejtohet arbitrazhit ndërkombëtar për çështjen e Aeroportit të Vlorës.
Sipas reagimit të “Mabco”-s, procedurat për ndjekjen e konfliktit në arbitrazh kanë nisur tashmë. Kompania kishte paralajmëruar edhe më herët se mund të ngrinte padi kundër shtetit shqiptar, duke iu referuar marrëveshjes koncesionare dhe traktatit të investimeve mes Shqipërisë dhe Zvicrës.
Punimet për ndërtimin e aeroportit nisën zyrtarisht në nëntor 2021.
Sipas planit fillestar, ndërtimi duhej të përfundonte brenda rreth tre vjetësh dhe aeroporti të niste operimet gjatë vitit 2025.
Afatet janë tejkaluar, ndërsa aeroporti vazhdon të mos jetë funksional.
Nisja e procedurës për prishjen e koncesionit dhe paralajmërimi për arbitrazh hapin një fazë të re të konfliktit për të ardhmen e projektit. /skyweb.al
