Autoriteti Kombëtar i Ushqimit (AKU) ka ndërhyrë për të bllokuar nga tregu një produkt të importuar me origjinë nga Turqia, pas alarmit të lëshuar nga autoritetet greke për përmbajtje të rrezikshme.
Bëhet fjalë për produktin ‘Red Forest Fruit Cake’, një pluhur frutash që përdoret në industrinë e ëmbëlsirave, brenda të cilit është zbuluar “e kuqe reaktive 141”, një pigment sintetik i ndaluar për përdorim në ushqime.
Ky ngjyrues, që zakonisht përdoret për tekstile, është i ndaluar për konsum njerëzor dhe në kozmetikë për shkak të efekteve të mundshme toksike. Sipas ekspertëve, përdorimi i tij në ushqime mund të rrezikojë seriozisht shëndetin e konsumatorëve.
Pas sinjalizimit nga pala greke, AKU kreu kontrolle në terren dhe bllokoi sasinë e mbetur në treg, e cila ishte në paketim 15 kg dhe me afat skadence deri në maj 2026. Autoriteti njoftoi se ka nisur procedurat për asgjësimin e produktit dhe paralajmëroi subjektet tregtare që të shmangin çdo përdorim të këtij lënde në përgatitjen e produkteve të konsumit.
AKU apelon për vigjilencë nga operatorët e biznesit ushqimor dhe njofton se kontrollet do të vijojnë në mënyrë të përforcuar për të garantuar sigurinë ushqimore të qytetarëve.
