Qeveria rajonale e Sardenjës ka miratuar skemën përfundimtare të “kontinuitetit territorial ajror”, një model i ri që synon të garantojë çmime të përballueshme të biletave për udhëtimet ajrore drejt dhe nga ishulli, duke i ardhur në ndihmë rezidentëve, studentëve, punonjësve dhe kategorive të tjera sociale.
Vendimi vjen pas mbledhjes së Konferencës së Shërbimeve të mbajtur më 11 gusht, e thirrur nga presidentja e Rajonit, Alessandra Todde, në prani të përfaqësuesve të Ministrisë italiane të Infrastrukturës dhe Transportit si dhe Agjencisë Kombëtare të Aviacionit Civil (ENAC).
Tashmë skema do t’i kalojë shqyrtimit të Komisionit parlamentar rajonal dhe më pas votimit në Këshillin rajonal, përpara se të firmoset nga ministri i Transportit, ç’ka do të hapë rrugë për shpalljen e garave ndërmjet kompanive ajrore.
Çfarë parashikon skema e re?
Modeli i ri shtrin fluturimet me tarifa të reduktuara nga aeroportet e Cagliari-t, Olbia-s dhe Alghero-s drejt Romës (Fiumicino) dhe Milanos (Linate), duke garantuar:
Bileta për rezidentët me tarifë rreth 30 euro për Romën dhe 44 euro për Milanon (pa taksa aeroportuale).
4 fashë orare fluturimesh çdo ditë (nga ora 06:00 deri në 23:00), për të mundësuar udhëtime vajtje-ardhje brenda ditës.
Zgjerim të përfituesve, përveç rezidentëve, edhe për punonjës me bazë në ishull, studentë deri në 27 vjeç, sportistë, invalidë me shoqërues dhe të moshuar mbi 70 vjeç.
Tavan tarifash edhe për jo-rezidentët, që udhëtojnë shpesh për arsye familjare, shëndetësore apo pune në Sardenjë.
Presidentja Todde e konsideroi vendimin “hapin e fundit drejt një modeli më të drejtë dhe më të aksesueshëm të mobilitetit”, duke shtuar se “Sardenja nuk mund të mbetet ishull i shkëputur për shkak të çmimeve të kripura”.
Skema e re pritet të hyjë në fuqi menjëherë pas hyrjes në fuqi të dekretit të Ministrisë italiane të Transportit, duke shënuar një ndryshim të rëndësishëm në lidhjet ajrore të ishullit me pjesën tjetër të Italisë.
Përfitues direkt pritet të jenë qytetarët sardë, pendolarët, studentët dhe bizneset, të cilët prej kohësh kanë denoncuar koston e lartë të udhëtimeve. /ansa.it
