Rritja e çmimeve të karburanteve pas nisjes së konfliktit në Iran po vijon të mbajë nën presion operatorët e transportit publik në vend, të cilët paralajmërojnë se kostot e larta të naftës po rëndojnë ndjeshëm aktivitetin e tyre financiar.
Për këtë arsye, Shoqata e Transportit Publik Qytetas i ka kërkuar qeverisë zgjatjen edhe me tre muaj të skemës së kompensimit të naftës me 50 lekë për litër, konkretisht për periudhën korrik-shtator 2026.
Kërkesa i është drejtuar Ministrisë së Pushtetit Vendor, Ministrisë së Financave dhe Ministrisë së Infrastrukturës dhe Energjisë, ndërsa operatorët argumentojnë se çmimet e larta të karburantit po rrezikojnë vazhdimësinë normale të shërbimit të transportit publik.
Në letrën dërguar institucioneve, shoqata thekson se karburanti përbën një nga kostot kryesore të aktivitetit dhe se vijimi i çmimeve të larta ka sjellë vështirësi në përballimin e detyrimeve financiare të operatorëve.
Sipas tyre, vazhdimi i skemës së kompensimit është i domosdoshëm për të shmangur reduktimin e flotës dhe të frekuencave të shërbimit, si dhe për të ruajtur përballueshmërinë e transportit publik për qytetarët.
Qeveria kishte miratuar më herët një paketë kompensimi prej 50 lekësh për litër për periudhën mars-maj 2026, ndërsa operatorët kërkojnë që e njëjta formulë të vijojë edhe për tre muaj të tjerë.
Shoqatat e transportit kujtojnë se edhe gjatë krizës së çmimeve në vitin 2022, operatorët u kompensuan për 6 muaj me 100 lekë për litër naftë.
Pakënaqësitë për kostot e larta të karburantit kanë sjellë më herët edhe protesta nga operatorët, të cilët reduktuan për gati dy ditë numrin e autobusëve në qarkullim deri në 60%, duke krijuar probleme në lëvizjen e qytetarëve në Tiranë dhe qytete të tjera./skyweb.al
