Një nga mendjet më të ndritura pas zhvillimit të inteligjencës artificiale, Geoffrey Hinton, ka dhënë një këshillë surprizuese për të rinjtë: të mos kufizohen vetëm në ndjekjen e karrierave teknologjike, por të orientohen drejt profesioneve praktike dhe manuale. “Nëse po mendon çfarë të studiosh, bëhu hidraulik”, tha Hinton në një intervistë për BBC Neës, duke theksuar se zanatet manuale janë shumë më të vështira për t’u automatizuar nga makinat.
Profesori i Universitetit të Torontos dhe një nga pionierët e AI, Hinton paralajmëron se përparimi marramendës i teknologjisë po kërcënon miliona vende pune, përfshirë ato në sektorin e teknologjisë së informacionit. Ndërsa gjigantë si OpenAI dhe Google po zhvillojnë sisteme gjithnjë e më të sofistikuara, pasojat për tregun e punës mbeten të paqarta dhe potencialisht shqetësuese.
“Po ndërtojmë sisteme që mund të tejkalojnë inteligjencën njerëzore dhe që nuk ndajnë domosdoshmërisht vlerat tona”, paralajmëroi ai. Megjithatë, Hinton beson se vetëm përmes bashkëpunimit global dhe vendosjes së kufijve etikë mund të kontrollohet ndikimi i kësaj teknologjie.
Për Hintonin, sfida e së ardhmes nuk është vetëm teknologjia, por mënyra se si njerëzimi do të përballet me të: “Inovacioni duhet të ecë krah për krah me etikën. Pa një balancë të tillë, AI mund të transformojë rrënjësisht jetën tonë dhe jo domosdoshmërisht për mirë.” /Skyweb.al
