Efektivët e Forcave Speciale Shqiptare kanë zhvilluar gjatë këtij muaji një stërvitje intensive në repartin e Regjimentit të Forcave Speciale në Zall Herr, nën mbikëqyrjen e instruktorëve të Forcave Speciale të Shteteve të Bashkuara.
Trajnimi është fokusuar në lëvizjen në terren kompleks, operimin në fshehtësi dhe rritjen e aftësisë së njësisë për të vepruar pa u zbuluar, me qëllim identifikimin dhe neutralizimin e kërcënimeve në kushte reale operacionale.
Sipas një njoftimi të publikuar në rrjetet sociale nga ambasada amerikane në Tiranë, kjo stërvitje është pjesë e bashkëpunimit të vazhdueshëm mes forcave shqiptare dhe aleatëve ndërkombëtarë, me synim forcimin e gatishmërisë operacionale dhe rritjen e ndërveprimit në misionet moderne të operacioneve speciale.
Aktiviteti ka synuar gjithashtu përmirësimin e saktësisë në terren dhe koordinimin mes njësive, duke rritur standardet e sigurisë dhe efikasitetit në operacione të ndjeshme.
Stërvitja në Zall Herr vjen në kuadër të përpjekjeve për të përmirësuar kapacitetet e Forcave Speciale Shqiptare dhe për të forcuar bashkëpunimin me partnerët strategjikë në përballjen me sfidat e sigurisë.
