Vojo Bregu, ish-Sekretar i Përgjithshëm i Ministrisë së Bujqësisë deri në vitin 2017, ka reaguar në rrjetet sociale lidhur me përhapjen e murtajës tek bagëtitë dhe vështirësitë që po përjetojnë aktualisht fermerët shqiptarë. Në një mesazh drejtuar ministres së Bujqësisë, Anila Denaj, Bregu kërkon që të ndërmerret një politikë e menjëhershme dëmshpërblimi, duke sjellë si shembull përvojën e vitit 2016, kur u përball me epideminë e dermatozës nodulare tek lopët.
Bregu kujton se në atë kohë, Ministria e Bujqësisë vendosi të dëmshpërblinte çdo blegtor në të gjithë vendin për çdo kokë lopë të humbur, ndonëse sëmundja nuk ishte parashikuar në listën zyrtare të dëmshpërblimeve. Sipas tij, vendimi për të importuar mëshqerra të mbarsura nga Danimarka rezultoi i suksesshëm, pasi solli rritje të prodhimit të qumështit dhe përmirësim të rendimentit të blegtorisë.
“Pa dëmshpërblyer blegtorët, çdo veprim i ndërmarrë nga ministria, përfshirë ngritjen e një task-force, do të ishte i kotë,” shkruan Bregu. Ai propozon që të blihet një numër i kufizuar krerësh nga jashtë vendit, me rendiment të lartë, që të shpërndahen për blegtorët më të prekur nga epidemia aktuale, duke e cilësuar këtë si një zgjidhje efektive dhe jo financiarisht e rëndë për shtetin.
Në mesazhin e tij, Bregu thekson se një vendim i tillë do të ndihmonte në rikthimin e shpresës tek fermerët dhe do të shërbente si politikë konkrete për përballimin e krizës. Ai shton se në vitet 2017–2018, pas ndërhyrjes së vitit 2016, ishte hera e vetme që prodhimi i qumështit në Shqipëri nuk pësoi rënie.
Duke e përfunduar reagimin si “një këshillë miqësore, jopolitike”, Bregu thekson se nuk ia drejton mesazhin kryeministrit Rama, pasi sipas tij “ka hequr dorë nga bujqësia dhe blegtoria që prej ndërprerjes së fondeve të IPARD-it.”
Reagimi i tij pason një seri raportimesh për blegtorë që shprehin publikisht dëshpërimin për humbjet e mëdha në tufat e tyre, ndërkohë që shifrat e para tregojnë për rreth 800–900 krerë të ngordhura. /skyweb.al
