Kreditimi për blerje banesash mbetet një nga segmentet më aktive të sistemit bankar në vend, edhe pse Banka e Shqipërisë ka vendosur rregulla më të forta për këtë treg.
Sipas të dhënave të fundit nga Raporti i Stabilitetit Financiar, kredia për individët është rritur me rreth 20% në vit, ku pjesën më të madhe e zë financimi për blerje banese.
Statistikat tregojnë se bankat vijojnë të mbështesin fort këtë segment, duke e konsideruar si një nga motorët kryesorë të kreditimit.
Megjithatë, kjo rritje po ndodh në një mjedis më të kujdesshëm. Bankat kanë shtrënguar kriteret e dhënies së kredisë, ndërsa norma e refuzimit të aplikimeve ka arritur në rreth 32%, duke reflektuar filtrin më të fortë në përzgjedhjen e klientëve.
Raporti evidenton gjithashtu një dobësim të lehtë të kërkesës për kredi banese dhe një përkeqësim të moderuar të aftësisë paguese të familjeve, në një kohë kur çmimet e banesave janë rritur ndjeshëm gjatë vitit të fundit.
Në këtë kontekst, kufizimet e Bankës së Shqipërisë synojnë të ulin rrezikun në treg. Bankat janë të detyruara të financojnë vetëm një pjesë të vlerës së pronës, të mbajnë këstin mujor brenda një niveli të përballueshëm të të ardhurave dhe të tregohen më të kujdesshme me kreditë në valutë për individët që paguhen në lek.
Pavarësisht këtyre rregullave, niveli i kredive të miratuara për banesa vijon të rritet, duke treguar se bankat nuk janë tërhequr nga tregu, por po operojnë me një qasje më selektive.
Zhvillimet tregojnë se kreditimi për strehim mbetet një shtyllë kryesore e aktivitetit bankar, por në një fazë ku rritja shoqërohet me kontroll më të fortë të rrezikut dhe me kërkesa më të larta për huamarrësit. /skyweb.al
