Aeroporti Ndërkombëtar i Tiranës ka vijuar trendin pozitiv të rritjes edhe gjatë muajit mars, duke regjistruar 817 mijë pasagjerë dhe duke forcuar më tej pozicionin si një nga nyjet kryesore të transportit ajror në rajon.
Sipas të dhënave zyrtare, aktualisht TIA është e lidhur me 80 destinacione në 27 shtete, ndërsa rrjeti i fluturimeve vijon të zgjerohet, duke reflektuar rritjen e kërkesës për udhëtime ajrore.
Destinacionet më të kërkuara mbeten qytete si Milano, Londra dhe Roma, ku operohen fluturime të përditshme, ndërsa gjatë muajit mars janë shtuar edhe disa destinacione të reja në rrjet.
Ndër to përfshihen Santander, Dublin, Liverpool, Billund, Bratislava dhe Ankara, duke rritur më tej ofertën për udhëtarët shqiptarë dhe të huaj.
Një tjetër zhvillim është edhe hyrja e një partneri të ri në treg, kompanisë ajrore AJet, e cila pritet të kontribuojë në zgjerimin e mëtejshëm të lidhjeve ajrore nga Tirana.
Zgjerimi i vazhdueshëm i rrjetit dhe rritja e numrit të pasagjerëve konfirmojnë trendin e fortë të zhvillimit të aeroportit, në një kohë kur kërkesa për udhëtime vijon të mbetet e lartë.
