Qarkullimi në aksin kombëtar Librazhd-Pogradec është ndërprerë plotësisht për të gjitha kategoritë e mjeteve, pasi struktura e urës mbi lumin Shkumbin është dëmtuar nga gërryerja e vazhdueshme e këmbëve mbajtëse.
Vendimi është marrë nga Autoriteti Rrugor Shqiptar pas vlerësimit të përkeqësimit të situatës gjatë dy ditëve të fundit.
Sipas drejtuesit të ARRSH-së, Ami Kozeli, lëvizjet e konstatuara në strukturë janë rritur ndjeshëm, ndërsa dëmtimet në bazamentin e urës kanë avancuar, duke krijuar rrezik real për sigurinë e trafikut.
Monitorimi i vazhdueshëm ka treguar zhvendosje progresive të elementëve mbajtës dhe degradim të betonit në pjesën e poshtme të konstruksionit, çka ka bërë të pashmangshëm vendimin për mbyllje totale.
Autoritetet nuk japin ende një afat për rikthimin e qarkullimit, pasi situata kërkon vlerësim të detajuar teknik dhe gjetjen e një zgjidhjeje të përkohshme, si ndërtimi i një by-pass-i apo ndërhyrje emergjente në strukturë. Deri atëherë, trafiku mbetet i devijuar.
Për automjetet e lehta është rekomanduar përdorimi i itinerarit alternativ Gramsh-Maliq, ndërsa për mjetet e rënda aktualisht nuk është përcaktuar një rrugë zëvendësuese funksionale, duke krijuar vështirësi për transportin e mallrave në këtë korridor.
Mbyllja e këtij aksi prek një nga lidhjet kryesore mes juglindjes dhe qendrës së vendit, duke rritur kohën e udhëtimit dhe kostot logjistike. Situata pritet të mbetet dinamike deri në stabilizimin e plotë të strukturës dhe miratimin e ndërhyrjes përfundimtare. /skyweb.al
