Indeksi i punësimit në tremujorin e katërt të vitit 2025 paraqet një ecuri të përzier në sektorë të ndryshëm të ekonomisë, krahasuar me të njëjtën periudhë të vitit 2024, duke reflektuar ndryshimet në kërkesën për fuqi punëtore.
Rritja më e fortë e punësimit është regjistruar në sektorin e tregtisë me shumicë dhe pakicë, si dhe në riparimin e automjeteve, me një rritje prej 9.3 për qind. Sektori i hoteleve vijon gjithashtu trendin pozitiv me një rritje prej 8.6 për qind, duke konfirmuar zgjerimin e aktivitetit në turizëm.
Rritje e moderuar është shënuar në pasuritë e paluajtshme me 4.3 për qind dhe në agjencitë e udhëtimit me 4.0 për qind. Aktivitetet e arkitekturës dhe inxhinierisë kanë regjistruar një rritje prej 3.7 për qind, ndërsa sektori i bareve dhe restoranteve ka pasur një rritje më të kufizuar, në nivelin 1.5 për qind.
Në sektorin e informacionit dhe komunikacionit, punësimi është rritur lehtë me 1.2 për qind, duke reflektuar një stabilitet relativ në këtë industri.
Nga ana tjetër, disa sektorë kanë shënuar tkurrje të punësimit. Transporti, magazinimi dhe posta kanë regjistruar një rënie prej 3.0 për qind, ndërsa aktivitetet e sigurimit dhe hetimit kanë pësuar një ulje prej 2.7 për qind. Aktivitetet ligjore dhe të kontabilitetit kanë shënuar një rënie të lehtë me 0.7 për qind.
Rënia më e fortë evidentohet në administrimin e zyrave dhe mbështetjen administrative, ku punësimi ka rënë me 8.6 për qind.
Të dhënat tregojnë një rritje të përqendruar të punësimit në sektorët e lidhur me tregtinë dhe turizmin, ndërsa disa shërbime mbështetëse dhe logjistike po përballen me ulje të numrit të të punësuarve. /skyweb.al
