Qeveria propozon heqjen e përjashtimit nga taksa vjetore për makinat e reja dhe elektrike, duke u tërhequr nga disa prej lehtësive që synonin rinovimin e flotës dhe uljen e ndotjes.
Ndryshimi është pjesë e projektligjit “Për taksat kombëtare”, i cili parashikon që nga 1 janari 2027 të hiqet taksa e qarkullimit nga nafta dhe benzina, ndërsa një pjesë e të ardhurave të mblidhet përmes pagesave më të larta për automjetet.
Nga karburantet propozohet të hiqen 27 lekë taksë për litër, ose 32,4 lekë bashkë me TVSH-në. Por zhvendosja e barrës te automjetet përfshin edhe kategoritë që deri tani ishin favorizuar si alternativa më pak ndotëse.
Për makinat elektrike parashikohet një taksë fikse prej 15 mijë lekësh në vit. Aktualisht, këto mjete përjashtohen nga taksa vjetore e mjeteve të përdorura dhe paguajnë vetëm tarifën administrative prej 200 lekësh për këtë shërbim.
Ndërkohë, projektligji heq përjashtimin që gëzojnë sot automjetet me vjetërsi deri në tre vjet. Kjo do të thotë se pagesa vjetore do të nisë edhe për makinat sapo dalin në qarkullim.
Edhe për automjetet nën pesë vjet do të zbatohet formula që shumëzon cilindratën e motorit me koeficientin e vjetërsisë dhe tarifën sipas karburantit. Për autoveturat deri në 2 000 cm³, tarifa propozohet të jetë 25 lekë për naftën dhe 20 lekë për benzinën apo gazin.
Kështu, blerësit e makinave të reja humbasin periudhën e përjashtimit nga taksa, ndërsa pronarët e elektrikeve përballen me një detyrim të ri të përvitshëm. Pagesat shtesë synojnë të mbulojnë pjesërisht të ardhurat që buxheti humbet nga heqja e taksës te karburantet.
Tërheqja prek lehtësitë e taksës vjetore. Përjashtimi nga TVSH-ja për automjetet 100% elektrike, të reja dhe me zero kilometra, nuk rezulton të hiqet nga ndryshimet e përshkruara në këtë draft.
