Gjykata Kushtetuese ka vendosur këtë të premte të heqë pezullimin nga detyra të zëvendëskryeministres dhe ministres së Infrastrukturës dhe Energjisë, Belinda Balluku, duke i rikthyer asaj ushtrimin e funksioneve pas rreth tre orësh diskutimesh në mbledhjen e gjyqtarëve.
Vendimi u mor me shumicë votash dhe pezullon efektet e dy vendimeve të Gjykatës së Posaçme të Shkallës së Parë për Korrupsionin dhe Krimin e Organizuar.
Sipas njoftimit, Kushtetuesja shfuqizon përkohësisht dispozitat e vendimeve nr. 118 dhe nr. 120, të datave 19 dhe 22 nëntor 2025, duke i konsideruar aktet që kanë vendosur masën ndaluese të pezullimit si cenim të garancive kushtetuese të imunitetit të anëtarit të Këshillit të Ministrave dhe të parimit të ndarjes së pushteteve.
Vendimi bllokon zbatimin e masës deri në përfundimin e shqyrtimit në themel.
Për shkak të interesit të lartë publik, Gjykata Kushtetuese vendosi që çështja të kalojë për shqyrtim në një seancë plenare publike që do të zhvillohet në janar.
Në këtë proces do të thirren si subjekte të interesuara SPAK, GJKKO e Shkallës së Parë, Kuvendi i Shqipërisë dhe Presidenti i Republikës.
Qeveria kishte kërkuar interpretim kushtetues lidhur me kompetencat dhe kufijtë e institucioneve në raport me pezullimin e një anëtari të Këshillit të Ministrave, duke theksuar se një masë e tillë nuk mund të vendoset pa respektuar garancitë kushtetuese dhe procedurale që lidhen me imunitetin.
Me këtë vendim, Balluku rikthehet menjëherë në detyrë, ndërsa shqyrtimi i çështjes në themel do të përcaktojë nëse vendimet e GJKKO-së përbënin tejkalim kompetencash apo cenim të parimeve kushtetuese. /skyweb.al
