Një raport i ri nga Mozilla Foundation ka analizuar privatësinë e gjashtë aplikacioneve të njohura për ndjekjen e ciklit menstrual: Flo, Clue, Stardust, Spot On, Period Calendar dhe Euki. Gjetjet tregojnë se disa aplikacione mbrojnë mirë të dhënat e përdoruesve, ndërsa të tjera mund t’i ndajnë ato me kompani të jashtme si Google, Meta dhe TikTok, shkuran BBC.
Rasti më problematik ishte Stardust, i cili dërgonte të dhëna të detajuara shëndetësore, si statusi i shtatzënisë, përdorimi i kontraceptivëve, simptomat dhe humori, te një kompani analitike e quajtur RudderStack. Kompania thotë se këto të dhëna përdoren vetëm për qëllime teknike dhe nuk shiten.
Mozilla ngriti shqetësime edhe për Spot On të Planned Parenthood, pasi disa funksione të aplikacionit lidhen me faqen e internetit të organizatës, e cila mund të ndajë informacione rreth kërkimeve shëndetësore me kompani analitike.
Disa aplikacione nuk ndajnë të dhëna shëndetësore, por mbledhin informacione për përdoruesit, pajisjet dhe përdorimin e aplikacionit për reklama dhe analiza. Këto të dhëna mund të krijojnë rreziqe për privatësinë, sidomos pas ndryshimeve ligjore në SHBA lidhur me abortin.
Aplikacioni Euki u vlerësua më së miri nga Mozilla, sepse ruan të dhënat vetëm në pajisjen e përdoruesit, nuk kërkon llogari dhe ofron funksione shtesë sigurie. Flo dhe Clue morën vlerësime më pozitive për transparencën dhe kontrollet e privatësisë, megjithëse ruajnë të dhënat në serverët e tyre.
Raporti thekson se përdoruesit duhet të kontrollojnë jo vetëm politikat aktuale të privatësisë, por edhe historikun e aplikacioneve. Për shembull, Flo ka pasur më parë probleme me ndarjen e të dhënave, edhe pse kompania thotë se praktikat e saj janë përmirësuar.
Mozilla rekomandon që përdoruesit të zgjedhin aplikacione që mbledhin sa më pak të dhëna, ofrojnë kontroll mbi privatësinë dhe shmangin ndarjen e informacionit shëndetësor me kompani të tjera. /skyweb.al
