Gjykata Kushtetuese vendos të rikthejë në detyrë Belinda Ballukun, duke rrëzuar masën e pezullimit të vendosur nga GJKKO dhe pranimin e ankimit të kryeministrit Edi Rama.
Sipas njoftimit zyrtar, Mbledhja e Gjyqtarëve shqyrtoi paraprakisht çështjen e kërkuar nga Kryeministri i Shqipërisë, e cila lidhej me zgjidhjen e mosmarrëveshjes së kompetencës së krijuar ndërmjet Kryeministrit dhe Këshillit të Ministrave, nga njëra anë, dhe GJKKO-së së Shkallës së Parë, nga ana tjetër, lidhur me pezullimin e ushtrimit të detyrës së anëtarit të Këshillit të Ministrave, raporton për Klan News gazetarja Glidona Daci.
Në njoftim theksohet se Gjykata Kushtetuese, me shumicë votash, vendosi pezullimin e zbatimit të vendimeve gjyqësore nr. 118, datë 19.11.2025 dhe nr. 120, datë 22.11.2025”, të cilat kishin vendosur ndaj Ballukut masën ndaluese “Pezullimi i ushtrimit të një detyre a shërbimi publik”. Për pasojë, vendimi i GJKKO-së humbet efekt deri në shqyrtimin përfundimtar të çështjes.
Gjithashtu, Gjykata vendosi “kalimin e çështjes për shqyrtim në seancë plenare publike për shkak të interesit të lartë publik”, duke thirrur si subjekte të interesuara SPAK-un, GJKKO-në, Kuvendin e Shqipërisë dhe Presidentin e Republikës.
Në respekt të procedurave, u caktua gjithashtu data e seancës plenare publike: 22 janar 2026, ora 10:00, siç përcakton neni 27 i Rregullores së Gjykatës Kushtetuese në rastet kur pranohet pezullimi.
Vendimi i pezullimit do të botohet në Fletoren Zyrtare dhe ka efekt të menjëhershëm, duke mundësuar kthimin e Belinda Ballukut në detyrë deri në vendimin përfundimtar të Gjykatës Kushtetuese. /Skyweb.al
