Një shpërthim i fuqishëm është regjistruar mëngjesin e sotëm në karburantin “EiDA”, në zonën e Bërrylit në Tiranë, duke shkaktuar plagosjen e tre punonjësve dhe dëme të konsiderueshme materiale.
Sipas informacioneve paraprake, shpërthimi dyshohet se është shkaktuar nga një bombol gazi në ambientin ku furnizohen automjetet. Si pasojë e forcës së shpërthimit, një godinë njëkatëshe brenda karburantit është shembur.
View this post on Instagram
Tre punonjësit e plagosur janë transportuar në spital, ku po marrin ndihmë mjekësore. Deri tani nuk ka informacion zyrtar për gjendjen e tyre shëndetësore.
Në momentin e ngjarjes, në karburant ndodhej edhe një automjet që po furnizohej me gaz. Ende nuk dihet nëse drejtuesi apo persona të tjerë janë lënduar.
Shpërthimi ka shkaktuar panik mes banorëve dhe bizneseve të zonës, ndërsa dëmet në godinën e karburantit janë të mëdha.
Në vendngjarje kanë mbërritur policia, zjarrfikësit dhe shërbimet e emergjencës. Autoritetet kanë nisur hetimet për të përcaktuar shkakun e saktë të shpërthimit dhe për të verifikuar nëse në ambientet e karburantit respektoheshin kushtet teknike të sigurisë.
