Ambasadori Paolo Zampolli, i Dërguari Special i Presidentit të SHBA-së për Partneritetet Globale ka zhvilluar takim edhe në ambientet e Agjencisë së Mbikëqyrjes Policore.
Lajmi është bërë i ditur nga Klevis Qose, kreu i Agjencisë së Mbikëqyrjes Policore përmes një postimi, ku thuhet se gjatë takimit u diskutua për bashkëpunimin Shqipëri-SHBA në fushën e sigurisë dhe inteligjencës
Sipas Qoses, një prej çështjeve të ngritura gjatë takimit me ambasadorin ishte trafikimi i paligjshëm i fentanilit dhe nevoja për koordinim më të ngushtë kundër rrjeteve të përfshira në prodhimin dhe trafikimin e tij.
Në takim është diskutuar edhe për ardhjen e pritshme në Shqipëri të ambasadorit të ri amerikan, Gjeneral Lejtnant në pension Eric Wendt duke u konsideruar si një mundësi për forcimin e bashkëpunimit në siguri, luftën kundër krimit të organizuar dhe trafikimit të narkotikëve.
Qose i është referuar gjithashtu Urdhrit Ekzekutiv 14367, i cili u nënshkrua nga Presidenti Donald Trump lidhur me fentanilin e paligjshëm dhe kimikatet pararendëse të tij.
Postimi i kreut të AMP- së nuk jep detaje të tjera mbi përmbajtjen e bisedimeve apo mbi marrëveshje konkrete të arritura gjatë takimit.
