nga Skyweb.al
Prej tre ditësh, një foto e zv.kryeministres Belinda Balluku së bashku me pjesëtarë të stafit të saj, e publikuar në rrjetet sociale nga deputeti Gazmend Bardhi me mbishkrimin se ishte shkrepur në një “apartament privat në Nobis”, ka hapur një debat të gjerë mbi menaxhimin e të dhënave të sekuestruara nga SPAK.
Në qendër të diskutimit qëndron pikërisht origjina e fotos dhe mënyra se si ajo ka përfunduar në duart e një deputeti, nëse ka qenë në celularët e sekuestruar gjatë hetimeve ndaj Evis Berberit.
Debatin e isi ish-ministri i Drejtësisë Ylli Manjani që e cilësoi publikimin e fotos si provë se materiali është nxjerrë nga telefoni i Evis Berberit, i sekuestruar nga SPAK, duke akuzuar institucionin se po përdor në mënyrë selektive të dhënat e marra nga pajisjet elektronike të të hetuarve për të goditur publikisht individë të caktuar.
Faqja njohur Lolita publikoi më pas një foto të gazetarit Blendi Fevziu në të njëjtin ambient, duke ironizuar pretendimin se bëhej fjalë për një apartament privat. Postimi i Lolita-s nënvizoi se fotografia ishte shkrepur në Pallatin e Brigadave gjatë një ceremonie zyrtare, duke hedhur poshtë versionin e një ambienti privat në kompleksin Nobis.
Në një intervistë për “Off the Record” me Andrea Dangllin në A2 CNN, avokati i Evis Berberit, Gentjan Rumano, deklaroi se fotoja nuk është bërë në ndonjë apartament të tipit të përmendur nga Bardhi, por në një ambient me arkitekturë të vjetër italiane, me lartësi mbi 4 ose 5 metra dhe dritare që arrijnë mbi 3 metra, tipare që nuk ekzistojnë në ndërtimet moderne.
Sipas tij, fotoja nuk ka qarkulluar më parë në rrjetet sociale dhe origjina e saj lidhet pikërisht me pajisjet e konfiskuara nga SPAK dhe GJKKO.
Një foto, edhe pse pa rendësi ndoshta për hetimet ndaj Berberit ka rikthyer debatin mbi menaxhimin e informacionit nga dosjet hetimore dhe për publikime selektive të materialeve të sekuestruara.
Fotoja e stafit të zv.kryeministres është kthyer në një provë simbolike të shqetësimit për mënyrën se si administrohen të dhënat konfidenciale në hetime dhe se si ato mund të përdoren në betejat politike. /skyweb.al
