Inspektorati Shtetëror i Punës dhe Shërbimeve Shoqërore u ka bërë thirrje punëdhënësve që të mos mbajnë pasaportat apo dokumentet e identitetit të punonjësve, qoftë edhe me pretendimin se kjo bëhet “për siguri”.
Sipas institucionit, dokumentet personale janë pronë e punëmarrësit dhe duhet të qëndrojnë në çdo moment me të. Ato nuk mund të përdoren nga punëdhënësi si mjet kontrolli apo për të kufizuar lëvizjen e punonjësit.
Inspektorati paralajmëron se mbajtja e dokumenteve, kufizimi i lëvizjes dhe krijimi i një varësie të detyruar mund të jenë shenja të shfrytëzimit dhe trafikimit të personave për punë.
Institucioni u kërkon punonjësve që për raste të tilla të kërkojnë informacion ose të bëjnë denoncim pranë Inspektoratit të Punës, përmes faqes zyrtare, adresës elektronike info@sli.gov.al ose numrit të telefonit +355 4 236 8466.
“Respektoni të drejtat dhe mbroni dinjitetin në punë”, thuhet në njoftimin e Inspektoratit.
