Detyrimi për t’u ofruar klientëve mundësinë e pagesës me kartë ka rritur ndjeshëm numrin e terminaleve POS në Shqipëri.
Në gjysmën e parë të vitit 2026, bizneset janë pajisur me 7,399 terminale të reja.
Sipas të dhënave të Bankës së Shqipërisë, numri i terminaleve POS arriti në rreth 38 mijë në fund të qershorit, duke u rritur me afro 24% krahasuar me një vit më parë.
Rritja lidhet edhe me kërkesën e Administratës Tatimore që strukturat akomoduese, subjektet e transportit dhe institucionet apo shoqëritë publike me kapital shtetëror të instalonin POS/POI në çdo pikë shitjeje deri në maj.
Tatimpaguesit që pranojnë pagesa në para fizike duhet t’u ofrojnë klientëve edhe alternativën e pagesës me kartë.
Megjithatë, instalimi i terminalit nuk do të thotë domosdoshmërisht se ai përdoret rregullisht.
16 milionë pagesa në gjashtë muaj
Në gjashtë muajt e parë të vitit u realizuan rreth 16 milionë pagesa përmes terminaleve POS, nga 12.5 milionë në të njëjtën periudhë të vitit të kaluar. Rritja është rreth 28%, ndërsa numri më i lartë i transaksioneve u regjistrua në mars.
Edhe vlera e pagesave u rrit. Nga janari deri në qershor, nëpërmjet terminaleve POS qarkulluan 58 miliardë lekë, kundrejt 48.3 miliardë lekëve një vit më parë, ose rreth 20% më shumë.
Megjithatë, të dhënat nuk tregojnë një ndryshim të fortë të tendencës historike që mund t’i atribuohet vetëm detyrimit të ri. Pagesat me kartë kanë qenë në rritje edhe gjatë viteve të mëparshme.
Vetëm 38 mijë POS për 250 mijë njësi aktive
Hendeku ndërmjet numrit të bizneseve dhe terminaleve POS mbetet i madh. Sipas INSTAT-it, në Shqipëri kishte rreth 250 mijë njësi ligjore aktive gjatë vitit 2025, ndërsa në treg gjenden vetëm 38 mijë terminale.
Jo të gjitha njësitë aktive kanë domosdoshmërisht nevojë për POS, por shifrat tregojnë se përdorimi i pagesave elektronike mbetet ende i kufizuar në një pjesë të ekonomisë.
Deri në fund të vitit 2026, detyrimi për t’u pajisur me terminal POS do të shtrihet edhe te bizneset e sektorëve të tjerë, duke rritur më tej numrin e pikave ku konsumatorët mund të paguajnë me kartë.
