Memet janë në kulmin e tyre në rrjetet sociale pas masave të fundit të GJKKO-së dhe të dhënave që kanë dalë mbi ndikimin e Ergys Agasit në polici dhe shërbimin sekret.
Bisedat e ngrohta me Vlora Hysenin, me shprehje si “zemra”, “shpirti”, “tani duhet të fokusohemi te halli yt” apo se ata që po ia bënin këtë “duhet të paguanin”, kanë pushtuar thuajse të gjithë diskursin publik këto ditë në Shqipëri.
Gjysma e reagimeve është ironi dhe gjysma gallatë. Por përtej memeve, thelbi i gjithë kësaj lidhet me ndikimin e madhe që kishte krijuar një person pa asnjë detyrë politike apo shtetërore në institucionet më të rendësishme të Republikës së Shqipërisë.
Sipas asaj që është bërë publike deri tani nga dosja e SPAK-ut, e cila duket se do të thellohet më tej, Agasi merrte informacione nga SHISH-i nëpërmjet drejtueses së institucionit.
Po kështu, ai dyshohet se kishte nën kontroll kreun e Policisë së Shtetit dhe drejtues të tjerë të rendëishëm të këtij institucioni.
Raportimet mediatike flasin për hetime edhe ndaj dy drejtuesve të tjerë të rëndësishëm të Policisë, të konsideruar si njerëz të afërt me Agasin. Njëri është larguar nga detyra gjatë verës, ndërsa një drejtoreshë e rëndësishme, e cilësuar edhe si “drejtoresha e imazhit online të Gysit”, vazhdon çuditërisht të qëndrojë në detyrë. Me sa duket, drejtuesit e Policisë presin që t’ua arrestojnë në zyrë!
Për shkak të intensitetit të zhvillimeve dhe bujës së shkaktuar nga përfshirja e SHISH-it në një raport personal, nuk duhet anashkaluar skandali nga i cili nisi çmontimi i grupit të Agasit, dosja e AKSHI-t.
Sipas SPAK-ut, Agasi kishte nën ndikim drejtuesen e AKSHI-t, Mirlinda Karçanaj, dhe përmes saj kontrolloheshin tenderët që shkonin te biznesmeni Ermal Beqiri, i cili pastaj ndante paratë në shërbim të Agasit.
Një tjetër çështje, skandal që nuk ka shpërthyer ende, por që nuk është çudi të kthehet në seksionin e radhës të dosjes AKSHI, lidhet me pronat dhe veprimtarinë e Kadastrës. Një ish-drejtuese e institucionit dyshohet se ka qenë kontakt i afërt i Agasit dhe se përmes saj janë kryer manipulime të mëdha në Kadastër. Edhe ajo është marrë në pyetje nga SPAK.
Pra, me SHISH-in, Policinë e Shtetit, AKSHI-n dhe Kadastrën, ajo që shfaqet nga dosja është ngritja e një shteti brenda shtetit. Një rrjet institucionesh që, në vend se t’i shërbenin ligjit, dyshohet se ishin vënë në shërbim të një individi.
Tashmë SPAK duket se ka nisur çmontimin e shtetit paralel të Ergys Agasit, një njeri që, pa pasur asnjë post zyrtar kishte krijuar një fuqi të krahasueshme me atë të kryeministrit të vendit. /skyweb.al
