Një rritje momentale e çmimit të naftës në treg ka mjaftuar që operatorët e transportit urban të kërkojnë sërish subvencionim nga shteti dhe bashkitë.
Pronarët e autobusëve qytetas kanë dërguar një letër institucioneve duke kërkuar kompensim për shtrenjtimin e karburantit, ndërsa paralajmërojnë se në të kundërt mund të reduktojnë numrin e autobusëve në qarkullim.
Kërkesa vjen vetëm pak javë pasi në disa linja u miratua rritja e çmimit të biletës, përfshirë edhe linjën e Kamzës, ku këshilli bashkiak miratoi rritjen me votat e socialistëve dhe demokratëve.
Shoqata Kombëtare e Transportit Qytetas pretendon se brenda një jave çmimi i naftës është rritur me rreth 45 deri në 50 lekë për litër.
Sipas operatorëve, deri më 27 shkurt nafta për furnizim me shumicë kushtonte rreth 142-145 lekë për litër, ndërsa aktualisht furnizimi po bëhet me rreth 187 lekë për litër.
Në letrën drejtuar Ministrisë së Financave, Ministrisë së Infrastrukturës, Drejtorisë së Tatimeve dhe bashkive, shoqatat e transportit kërkojnë që institucionet të vlerësojnë situatën dhe të shqyrtojnë mundësinë e subvencionimit të karburantit për sektorin e transportit publik.
Megjithatë, kjo nuk është hera e parë që shoqata e transportit urban reagon menjëherë pas çdo lëvizjeje të çmimit të naftës.
Prej vitesh, sa herë që karburanti shtrenjtohet në treg, operatorët janë ndër të parët që kërkojnë kompensime apo subvencione, duke ushtruar presion ndaj institucioneve publike.
Kjo ndodh pavarësisht faktit se sektori ka përfituar vazhdimisht mbështetje financiare si nga bashkitë, ashtu edhe nga qeveria.
Një rast i tillë ishte në vitin 2022, kur pas rritjes së çmimit të naftës nga lufta Rusi-Ukrainë, qeveria miratoi rimbursimin me 100 lekë për litër për naftën e përdorur nga kompanitë e transportit gjatë disa muajve të krizës. /skyweb.al
