Programi i Llotarisë Amerikane do të ketë disa ndryshime të rëndësishme duke nisur nga aplikimet për DV-2027. Departamenti Amerikan i Shtetit ka publikuar një rregull të ri në Federal Register, me qëllim luftimin e mashtrimeve dhe aplikimeve të rreme.
Rregulli hyn në fuqi më 10 prill 2026 dhe pritet të zbatohet për programin DV-2027.
Ndryshimi kryesor është detyrimi për pasaportë të vlefshme gjatë aplikimit. Aplikantët duhet të vendosin të dhënat e pasaportës dhe të ngarkojnë online një skanim të faqes biografike dhe të faqes së nënshkrimit në format JPEG, deri në 5 MB. Nëse pasaporta është e skaduar ose dokumenti nuk ngarkohet, aplikimi refuzohet automatikisht.
Gjithashtu pritet të vendoset edhe një tarifë simbolike rreth 1 dollar për aplikim, për të ulur aplikimet masive dhe abuzimet.
Sipas autoriteteve amerikane, çdo vit zbulohen miliona aplikime mashtruese ose të dyfishta, shpesh nga palë të treta pa dijeninë e aplikantëve. Këto masa synojnë të identifikojnë më saktë aplikantët dhe të reduktojnë mashtrimet.
Personat që planifikojnë të aplikojnë për DV-2027 këshillohen të kenë pasaportë të vlefshme, skanimin e dokumentit gati dhe të aplikojnë vetëm një herë, pasi aplikimet e dyfishta çojnë në skualifikim. /skyweb.al
