Remitancat e emigrantëve arritën në 816.45 milionë euro gjatë periudhës Janar Shtator 2025, sipas të dhënave të Bankës së Shqipërisë, duke shënuar nivelin më të lartë historik të regjistruar për këtë interval kohor.
Dërgesat nga jashtë vijojnë të jenë një ndër burimet kryesore të të ardhurave për mijëra familje shqiptare dhe një nga shtyllat e konsumit në vend.
Por rritja nominale e remitancave vjen në një kontekst me ndikim negativ për përfituesit: zhvlerësimi i fortë i euros kundrejt lekut.
Me kursin që ka zbritur në nivele minimale historike, shumë familje kanë marrë më shumë euro, por më pak fuqi blerëse në lekë.
Llogaritjet tregojnë se, me kursin mesatar të nëntëmujorit në rreth 98.24 lekë për euro, vlera reale e remitancave për këtë periudhë arrin në rreth 80.2 miliardë lekë.
Por nëse do të aplikohej kursi mesatar i vitit 2022, kur euro këmbehej me 118.9 lekë, dërgesat e këtij viti do të vlenin rreth 97 miliardë lekë, pra afro 16.8 miliardë lekë më shumë.
Kjo diferencë e madhe tregon se familjet shqiptare, edhe pse kanë marrë më shumë euro nga të afërmit emigrantë, kanë mundur të blejnë më pak mallra e shërbime në tregun e brendshëm.
Situata ka prekur sidomos familjet që mbështeten te remitancat për shpenzimet e përditshme ose për investime të vogla.
Megjithëse hyrja e lartë e valutës është një sinjal pozitiv për ekonominë, zhvlerësimi i euros po i zbeh përfitimet direkte për konsumatorët shqiptarë. Në këtë kuadër, remitancat e vitit 2025 konfirmojnë një paradoks të ri ekonomik: më shumë para nga jashtë, por më pak vlerë reale në xhepat e familjeve. /skyweb.al
