Astrit Hysenaj, 54 vjeç, humbi jetën gjatë përmbytjeve në Durrës, ndërsa familjarët e tij kundërshtojnë publikisht versionin e Bashkisë së Durrësit, duke këmbëngulur se ai ka ndërruar jetë në krye të detyrës.
Ngjarja ka ndodhur në ditën e tretë të përmbytjeve, kur Hysenaj ishte nisur herët në mëngjes për në punë. Trupi i tij u gjet më vonë në një kanal kullues, në zonën e ish-repartit ushtarak pranë Plepave. Bashkia ka pretenduar se në momentin kur është marrë nga rrjedha e ujit, punonjësi nuk ka qenë në orar pune, por kjo është mohuar nga familjarët.
Sipas të afërmve, Astrit Hysenaj ka dalë nga shtëpia rreth orës 05:30, ashtu si çdo ditë tjetër, pavarësisht kushteve të rënda të motit dhe këshillave të familjes që të mos shkonte në punë. Deri në orën 10:30, kur përfundonte turni i tij zyrtar, familjarët nuk kanë pasur shqetësime, por pasi ai nuk është kthyer në shtëpi, është bërë kallëzim në polici dhe kanë nisur kërkimet.
Mbesa e tij, Klediana Bërsheni, deklaron se familja disponon pamje nga kamerat e sigurisë, të cilat tregojnë se deri rreth orës 08:25, Hysenaj ka qenë duke pastruar zonën pranë një mbikalimi këmbësorësh në aksin Plepa–Durrës. Sipas saj, ai shihet duke mbledhur mbetje dhe duke i hedhur në kosh, në kushte të vështira për shkak të nivelit të lartë të ujit.
Edhe djali i xhaxhait të viktimës, Osman Hysenaj, pohon se pamjet filmike tregojnë se 54-vjeçari ka qenë në detyrë deri në momentet e fundit. Ai thotë se pas orës 08:30 nuk ka më asnjë informacion për lëvizjet e tij dhe se familja dyshon se pikërisht gjatë kësaj kohe ai është rrëmbyer nga rrjedha e ujit.
Familjarët theksojnë se vendi ku u gjet trupi i tij përkon me rrjedhën e kanalit pranë zonës ku ai ishte parë për herë të fundit dhe kërkojnë që figura e tij të mos përbaltet. Sipas tyre, Astrit Hysenaj ka qenë duke kryer detyrën deri në fund dhe ka humbur jetën gjatë punës për përballimin e situatës së krijuar nga përmbytjet.
