Qiraja mesatare e një apartamenti në Tiranë ka arritur në 721 euro në muaj gjatë vitit 2026, duke u kthyer në një nga shpenzimet më të papërballueshme për individët dhe familjet.
Të dhënat e agjencive imobiliare, tregojnë se çmimet e qirave po vijojnë të rriten, ndërsa të ardhurat mujore nuk po ndjekin të njëjtin ritëm. Për një individ me pagë mesatare, pothuajse e gjithë paga neto duhet të përdoret vetëm për pagesën e qirasë.
Ekspertja e tregut të pasurive të paluajtshme dhe menaxherja ekzekutive e “Colliers International Albania”, Stela Dhami, thotë se shpenzimet për strehimin konsiderohen të përballueshme vetëm kur nuk kalojnë 30% të të ardhurave mujore të një familjeje.
Sipas koeficientit ndërkombëtar të përballueshmërisë së strehimit, kur qiraja kalon 30% të të ardhurave mujore bruto, familja konsiderohet se ndodhet nën stres financiar. Kur kjo peshë kalon 50%, situata klasifikohet si barrë ekstreme e kostos së strehimit dhe rrit rrezikun e pasigurisë për banesën.
Paga mesatare mujore bruto në Shqipëri arriti në 90,119 lekë, ose rreth 930 euro, gjatë tremujorit të parë të vitit 2026, sipas të dhënave të INSTAT.
Ndërkohë, qiraja mesatare mujore prej 721 eurosh, e përllogaritur nga “Monitor” mbi të dhënat e agjencisë imobiliare CPM, përbën rreth 77% të pagës mesatare bruto.
Situata është edhe më e rëndë kur llogaritja bëhet mbi pagën neto. Me një pagë mesatare neto prej rreth 72 mijë lekësh, ose 740 euro, qiraja përbën rreth 97% të të ardhurave mujore.
Kjo do të thotë se një individ me pagë mesatare praktikisht nuk mund të përballojë i vetëm një apartament me qira në Tiranë, pasi pas pagesës së banesës nuk i mbeten pothuajse fare të ardhura për ushqime, energji, transport apo nevoja të tjera.
Problemi mbetet i fortë edhe për familjet me dy të punësuar. Një familje me tre anëtarë, dy të rritur dhe një fëmijë, me të ardhura mesatare bruto prej rreth 182,200 lekësh, do të shpenzonte rreth 39% të të ardhurave për një qira prej 721 eurosh.
Në raport me të ardhurat neto, pesha e qirasë arrin rreth 49%, shumë pranë kufirit që konsiderohet barrë ekstreme financiare për strehimin.
Përveç qirasë, familjet shqiptare përballen edhe me kosto të larta për ushqimet, të cilat përbëjnë rreth 40% të shpenzimeve mujore, krahasuar me rreth 13% në Bashkimin Europian dhe më pak se 35% në vendet e rajonit.
Sipas INSTAT, familjet shqiptare shpenzuan mesatarisht 93 mijë lekë në muaj për konsum gjatë vitit 2024, me një rritje prej 1.5% krahasuar me një vit më parë.
Vetëm grupi “ushqime dhe pije joalkoolike” zinte 39.6% të buxhetit mujor të familjeve, me një shpenzim mesatar prej 36,879 lekësh.
Në zonat pranë qendrës së Tiranës, qiratë për apartamentet 1+1 gjatë vitit 2025 varionin nga 600 deri në 900 euro në muaj, ndërsa në periferi lëviznin nga 400 deri në 500 euro.
Për vitin 2026, në disa zona çmimet kanë shënuar rritje të mëtejshme. Pranë stadiumit “Dinamo”, apartamentet 1+1 ofrohen nga 500 deri në 1,000 euro në muaj, nga 500–800 euro që ishte intervali një vit më parë.
Në këtë zonë, çmimet maksimale janë rritur deri në 25%.
Rritje është shënuar edhe në zonën e Liqenit Artificial, ku qiratë maksimale për apartamentet 1+1 kanë arritur deri në 1,500 euro në muaj, nga 1,300 euro në vitin 2025, ose rreth 15% më shumë.
Në zonën e Komunës së Parisit, qiratë për apartamentet 1+1 varionin gjatë vitit të kaluar nga 500 deri në 800 euro. Në rrugën e Kosovarëve, apartamentet e kësaj tipologjie, së bashku me vendin e parkimit, kanë arritur deri në 900 euro në muaj.
Agjentët imobiliarë shpjegojnë se rritja e çmimeve lidhet jo vetëm me kërkesën e lartë, por edhe me kalimin e një numri të madh pronash në tregun e qirave afatshkurtra, duke zvogëluar ofertën për kontratat afatgjata.
Sipas të dhënave të AirDNA, vetëm në Tiranë kishte mesatarisht rreth 5,200 njësi të listuara për qira afatshkurtër gjatë vitit 2025, nga rreth një mijë njësi në vitin 2021.
Në rang vendi, gjatë vitit 2025 ishin të disponueshme rreth 26,300 apartamente përmes platformave Airbnb, Booking dhe Expedia, nga rreth 21 mijë një vit më parë. Rritja llogaritet në rreth 25%.
Sipas Stela Dhamit, në shtrenjtimin e qirave ka ndikuar edhe rritja e çmimeve të apartamenteve, veçanërisht në zonat pranë qendrës së Tiranës.
