Çmimi i arit ka kaluar 3,550 dollarë për ons këtë javë, duke shënuar nivele historike dhe duke përforcuar perceptimin e tij si një nga asetet më të sigurta në kohë pasigurie.
Brenda një viti ari është rritur gati një të tretën, dhe më 5 shtator arriti deri pranë 3,600 dollarëve për ons, pas publikimit të të dhënave të dobëta për tregun e punës në SHBA.
Ky zhvillim nxiti pritjet se Rezerva Federale do të ulë normat e interesit në muajt në vijim, duke bërë që investitorët të zhvendosen drejt arit, i cili bëhet më tërheqës kur kthimet nga obligacionet dhe depozitat bankare bien.
Rritja e arit nuk është thjesht një reagim i menjëhershëm ndaj të dhënave ekonomike amerikane. Ajo pasqyron një mjedis më të gjerë pasigurie gjeopolitike dhe financiare.
Luftërat në Ukrainë dhe Gaza, tensionet tregtare të Shteteve të Bashkuara me vendet e tjera, si dhe rënia e besimit tek institucionet financiare kanë shtuar kërkesën për një aset fizik, të kufizuar në natyrë dhe më pak të prekshëm nga politikat monetare.
Në këtë kuadër, ari shihet jo vetëm si një mbrojtje kundër inflacionit, por edhe si një garanci përballë luhatjeve të monedhave kryesore si dollari, sterlina apo jeni japonez.
Një faktor i rëndësishëm është roli i bankave qendrore dhe i fondeve të tregtimit në bursë.
Bankat qendrore, sidomos ato të vendeve që mbajnë rezerva të mëdha dollarësh, kanë shtuar blerjet e arit si një mënyrë për të diversifikuar asetet dhe për të ulur varësinë nga obligacionet amerikane. Kjo ka ndikuar drejtpërdrejt në rritjen e çmimit.
Paralelisht, fondet e tregtuara në bursë që ndjekin çmimin e arit kanë regjistruar hyrje të mëdha kapitali, duke e amplifikuar edhe më shumë këtë tendencë.
Dobësimi i dollarit amerikan është një tjetër shtysë. Për investitorët që veprojnë në monedha të tjera, ari bëhet më i përballueshëm kur dollari bie, duke nxitur kërkesën globale.
Ky fenomen është i dukshëm në tregjet e Azisë, ku raportimet e fundit tregojnë për nivele rekord në Indi dhe për rritje të fortë të kërkesës te konsumatorët dhe institucionet.
Rënia e besimit në politikat fiskale në Mbretërinë e Bashkuar dhe Japoni ka shtuar gjithashtu tendencën drejt arit, pasi investitorët kërkojnë një mbrojtje ndaj rrezikut të inflacionit dhe dobësimit të monedhave.
Kjo situatë tregon se arin nuk e shpjegon vetëm një faktor i vetëm, por një ndërthurje kompleksesh: presionet mbi Rezervën Federale për uljen e normave, dobësimi i dollarit, tensionet politike dhe tregtare, rritja e kërkesës nga bankat qendrore dhe perceptimi i tij si një strehë e sigurt.
Nëse Fed do të ndërhyjë me ulje të shpejta normash dhe pasiguria gjeopolitike do të mbetet e lartë, ari ka gjasa të ruajë ose edhe të tejkalojë nivelet aktuale.
Në të kundërt, një forcim i papritur i dollarit apo rritje e yield-eve reale mund ta ekspozojë atë ndaj korrigjimeve, por për momentin balanca e forcave është në favor të rritjes.
Duke parë të dhënat e fundit dhe zhvillimet globale, rekordi i arit nuk është një fenomen i rastësishëm, por pasqyrë e një epoke ku pasiguria ka shtyrë investitorët të kërkojnë siguri në metalin e verdhë. /skyweb.al
