Tregu i punës në Shqipëri do të jetë pjesë e masave penale të parashikuara në projekt-kodin e ri penal, i cili është hedhur për konsultim publik. Drafti parashikon një sërë veprash të reja penale që lidhen me punësimin e paligjshëm, shfrytëzimin e punëtorëve dhe rekrutimin me mashtrim.
Neni 660 i projekt-kodit parashikon se vendosja e punonjësve në kushte pune ose sigurimesh që cenojnë të drejtat ligjore dhe kontraktuale, mbajtja e tyre në kundërshtim me ligjin apo mosregjistrimi i punëtorëve në organet shtetërore përbëjnë kundërvajtje penale. Në varësi të numrit të punëtorëve të përfshirë, shkelja dënohet me gjobë ose me burgim deri në 30 ditë. Nëse veprimet kryhen me dhunë ose kanosje, dënimi shkon deri në 3 vite burg.
Projekt-kodi kriminalizon punësimin e përsëritur të shtetasve të huaj pa leje pune, punësimin e të miturve pa autorizim, si dhe çdo shkelje të të drejtave të tyre. Për këtë vepër parashikohet deri në 4 vite burg.
Një tjetër dispozitë ndëshkon penalisht rekrutimin e personave nëpërmjet mashtrimit, duke i shtyrë të lënë vendin e punës për oferta të rreme. Ky veprim dënohet me burgim deri në 45 ditë.
Neni 664 parashikon se kushdo që nxit ose ndihmon emigrimin e një personi me dokumente ose kontrata të rreme, apo me mashtrime të tjera të ngjashme, dënohet me gjobë ose deri në 4 vite burg.
Ky draft-kod vjen në një kohë kur informaliteti dhe shkeljet në tregun e punës janë mes sfidave kryesore për ekonominë shqiptare, duke synuar t’i japë një bazë të re ndëshkimore fenomenit të punësimit të paligjshëm dhe abuzimeve me fuqinë punëtore./skyweb.al
